قىتايدىڭ تورىندە ديماش اداي كۇيىن كۇمبىرلەتىپ، كورەرمەندەرىنىڭ دەلەبەزەسىن قوزدىردى

استانا. قازاقپارات -  ديماش «دايديداۋ» ءانىن قۇرمانعازى كۇيىمەن كومكەرىپ، كورەرمەننىڭ قوشەمەتىنە بولەندى.

بۇل تۋرالى Sputnik قازاقستان اگەنتتىگىنە قازاق ۇلتتىق ونەر ۋنيۆەرسيتەتىنىڭ تاربيە ءىسى جونىندەگى پرورەكتورى تۇرار الىپبايەۆ ايتىپ بەردى.

قىتايدا  I am singer بايقاۋىنا قاتىسىپ جاتقان ديماش قۇدايبەرگەن VII- كەزەڭدە «دايديداۋ» ءانىن شىرقاعان ەدى. حالىق ءانىن ديماش ءوزى وقىپ جاتقان قازاق ۇلتتىق ونەر ۋنيۆەرسيتەتىنىڭ حالىق اسپاپتار ءانسامبلىنىڭ سۇيەمەلدەۋىمەن ورىنداپ شىقتى. وسى ءانسامبلدى قىتايعا باستاپ بارىپ، انشىگە قولداۋ كورسەتكەن بەلگىلى كۇيشى، ۋنيۆەرسيتەتتىڭ تاربيە ءىسى جونىندەگى پرورەكتورى تۇرار الىپبايەۆ ءوز اسەرىمەن ءبولىسىپ، قىتايلاردىڭ قازاق ءانىن قالاي قابىلداعانىن اڭگىمەلەپ بەردى.

«حالىق ءانىن ايتاتىن بولعاننان كەيىن، ارينە، حالىق اسپاپتارىن الىپ باردىق. ونىڭ ىشىندە دومبىرا، شەرتەر، جەتىگەن، شاڭقوبىز، ۇرمالى اسپاپتاردان دابىل، قىلقوبىز، سىمقوبىز بار. حالىق ءارتىسى مايرا ءىلياس قىزى ەكەۋمىز جەتى ونەرپازدى باستاپ باردىق. ديماش وزىنە قولداۋ كورسەتۋ ءۇشىن قىتايعا كەلگەن وتانداستارىن كورىپ، قاتتى قۋاندى»، - دەيدى الىپبايەۆ.

بايقاۋ رەجيسسەرلەرىنىڭ نۇسقاۋى بويىنشا ديماشقا ءاننىڭ الدىندا كىرىسپە كەرەك بولعان. ءانشى قۇرمانعازىنىڭ «اداي» كۇيىن شەرتۋدى ۇيعارادى.

«الدىمەن ساحناعا جەكە ءوزى شىعىپ، كۇي اتاسى قۇرمانعازىنىڭ «اداي» كۇيىن دومبىرامەن وينايدى. وسىلاي «ادايمەن» باستاپ جىبەردى. ودان كەيىن وركەستر، مۋزىكا قوسىلىپ، «دايديداۋدى» ءانىن ورىنداي جونەلەدى»، - دەدى بەلگىلى كۇيشى.

پروفەسسوردىڭ اتاپ وتۋىنشە، قىتايلىق كورەرمەندەر قازاقتىڭ «دايديداۋ» حالىق ءانىن كەرەمەت قابىلداپ، ديماشتىڭ ونەرىنە ۇلكەن قوشەمەت كورسەتتى.

«كەرەمەت بولدى. قازىر مەن تىلمەن ايتىپ جەتكىزە المايمىن. حالىق اسپاپتارىنىڭ سۇيەمەلدەۋىمەن، ۇلتتىق بوياۋمەن ديماش تاماشا ونەر كورسەتتى. قازاق ءانىن سونداي تولعانىسپەن، جۇرەك تەبىرەنىسىمەن ورىندادى. جوعارى دارەجەدە ايتىپ شىقتى. مۋزىكا الەمدە بىرەۋ عوي، كورەرمەن وتە جاقسى قابىلداپ، تۇرىپ قول سوقتى. ءبارىمىز تەبىرەنىپ، دەنەمىز تىتىركەنىپ، سونداي ءبىر كەرەمەت سەزىمدە بولدىق»، - دەدى الىپبايەۆ.

پروفەسسور ديماش قۇدايبەرگەننىڭ الدا ءالى تالاي اسۋدى باعىندىراتىنىنا سەنىمدى. ول دارىندى جانە تالاپتى شاكىرتىنە ۇلكەن جەڭىستەر تىلەدى.

«ديماش ءوزىمىزدىڭ ستۋدەنت، ءوزىمىزدىڭ شاكىرتىمىز. بولاشاعىنان كوپ ءۇمىت كۇتتىرەتىن ونەرپاز. ءوزىم وعان سەنەمىن. ونىڭ جاقسى قاسيەتى - قاراپايىمدىلىعى. وتە اقىلدى جىگىت. قانشا تانىمال بولسا، وزگەرىپ كەتەتىن ادام ەمەس. بولاشاقتا الاتىن اسۋلارى كوپ»، - دەگەن ويىمەن ءبولىستى تۇرار بايدۇيسەك ۇلى.

ايتا كەتسەك، ديماش «دايديداۋ» ءانىن شىرقايتىن كەزەڭ ەفيرگە ءالى شىققان جوق. ال بايقاۋدىڭ سەگىزىنشى كەزەڭىندە ءانشىنىڭ قىتايشا ءان شىرقايتىنى بەلگىلى بولىپ وتىر.

kaz.365info.kz