اقتوبەنىڭ ءار اۋىلىندا كينوتەاترلار اشىلۋى مۇمكىن

اقتوبە. قازاقپارات - اقتوبەنىڭ ءار اۋىلى كينوتەاترمەن قامتىلۋى مۇمكىن. ءماجىلىس دەپۋتاتتارىمەن كەزدەسۋ كەزىندە مادەنيەت سالاسىنىڭ قىزمەتكەرلەرى مەملەكەتتىك- جەكەمەنشىك سەرىكتەستىك اياسىندا كينوتەاترلاردى قالپىنا كەلتىرۋ جولىن ۇسىندى،

دەپ حابارلايدى قازاقپارات ءتىلشىسى.

قازىر ينتەرنەت دامىعان زامان بولعانىمەن، اۋىل حالقىنىڭ باراتىن جەرى جوق. بارلىق كلۋبتار جابىلعان، ال مەكتەپتەردەگى ءماجىلىس زالى تەك مەرەكە كۇندەرى اتا- انالارعا شاعىن كونسەرت ۇيىمداستىرادى.

«اقتوبەگە ق ر پارلامەنتى ءماجىلىسىنىڭ دەپۋتاتى امانجان جامالوۆ كەلىپ، مادەنيەت سالاسىنىڭ قىزمەتكەرلەرىمەن كەزدەستى. سول كەزدە ول ءساۋىر ايىندا پارلامەنتتە «كينو تۋرالى» زاڭ قارالاتىنىن ايتتى. ءبىز ءوز تاراپىمىزدان اۋىلداعى كينوتەاترلاردى قايتا قالپىنا كەلتىرۋدى ۇسىندىق. 90-جىلداردىڭ اياعىندا وڭتايلاندىرىلۋ ءجۇرىپ، كينوفيكاتسيا باسقارماسى تاراپ، بۇل سالانىڭ يەسىز قالعانى ايتىلدى. قازىر ۇلتتىق، پاتريوتتىق رۋح بەرەتىن فيلمدەر ءتۇسىرىلىپ جاتىر. ءبىراق ول كوپشىلىككە، اۋىل حالقىنا جەتە بەرمەيدى. وسى ولقىلىقتىڭ ورنىن تولتىرۋ ءۇشىن جەرگىلىكتى جەردە كينو كورسەتۋدىڭ زاڭدى تەتىكتەرىن قاراستىرۋدى سۇرادىق»، - دەدى وبلىستىق مادەنيەت، مۇراعاتتار جانە قۇجاتتاما باسقارماسى باسشىسىنىڭ مىندەتىن اتقارۋشى قىدىرعالي ەرمۇحان.

 اقتوبەلىك مادەنيەت قىزمەتكەرلەرى بۇل جۇمىستى مەملەكەتتىك- جەكەمەنشىك سەرىكتەستىك نەگىزىندى ىسكە اسىرۋدى كوزدەپ وتىر. شاعىن كينوتەاترلار - ەڭ ءتيىمدى جولى.

 «اۋدان اكىمدەرىنە حابار بەرىپ، ۇسىنىس تۋرالى اقپارات تاراتىلدى. كاسىپكەرلەردىڭ دە قىزىعۋشىلىعى بار. ماسەلەن، تاياۋدا عانا ءبىر كاسىپكەر مارتوك، قوبدا اۋداندارىن ارالاپ، كينو كورسەتۋ ۇسىنىسىن ايتتى. قولداۋ حات جازىپ، اۋىلعا بارسا، مادەنيەت وشاقتارىن بەرەمىز. سونىمەن قاتار، بۇل سالانى قولعا العان كاسىپكەرلەردىڭ ارنايى اپپاراتۋرا الۋى ءۇشىن «دامۋ» قورى ارقىلى اقشا بولىنسە دەگەن ۇسىنىس بار»، - دەدى قىدىرعالي ەرمۇحان.

 اۆتور: التىناي ساعىندىقوۆا