شۆەتسيا مىندەتتى اسكەري قىزمەتتى قايتا ەنگىزبەك
«قاۋىپسىزدىك سالاسىنداعى احۋال وزگەرگەندىكتەن ۇكىمەت اسكەري الۋەتىن ارتتىرۋعا جانە جاراقتاندىرۋ جۇيەسىنىڭ بۇرىنعىدان دا تۇراقتى بولۋىنا مۇددەلى» دەپ مالىمدەگەن جەرگىلىكتى باسپا ءسوز قۇرالدارىنا شۆەتسيا قورعانىس ءمينيسترى پەتەر حۋلتكۆيست.
شۆەتسيا ازاماتتاردى مىندەتتى اسكەري قىزمەتكە شاقىرۋدى 2010 -جىلى توقتاتقان كەزدە ۇكىمەت قازىرگى زامانعى ارميا مىندەتتى اسكەري قىزمەتتى قاجەتسىنبەيدى دەگەن ەدى.
ناۋرىزدىڭ 2- كۇنى شۆەد ۇكىمەتى پارلامەنتكە ەلدە بيىل جازدان باستاپ مىندەتتى اسكەري قىزمەتتى قايتادان ەنگىزۋ تۋرالى زاڭ جوباسىن ەنگىزدى. قۇجاتتا 1999 -جىلدان كەيىن تۋعان بارلىق شۆەد ازاماتتارى ارميا قاتارىندا 11 اي اسكەري قىزمەت اتقارۋعا مىندەتتى دەپ كورسەتىلگەن.
شۆەتسيا 1994 -جىلى ناتو مەن وعان مۇشە ەمەس ەلدەر اراسىندا اسكەري ىنتىماقتاستىقتى دامىتۋعا باعىتتالعان «بەيبىتشىلىك ءۇشىن سەرىكتەستىك» باعدارلاماسىنا قول قويعان. سولتۇستىك ەۋروپاداعى مەملەكەتتەر اراسىندا ناتو ۇيىمىنا مۇشە ەمەس ەكى ەل - فينليانديا مەن شۆەتسيا سوڭعى جىلدارى رەسەي اسكەري بەلسەندىلىگىن ارتتىرعاننان كەيىن ا ق ش- پەن اسكەري ىنتىماقتاستىعىن نىعايتقان. فينليانديا مەن رەسەي اراسىندا ۇزىندىعى 1340 شاقىرىمدى قۇرايتىن شەكارا بار.
رەسەي فينليانديا مەن شۆەتسيانىڭ ناتو- عا مۇشە بولۋىنا قارسى. فينليانديا مەن شۆەتسيادا ناتو- عا مۇشە بولۋ مۇمكىندىگى - قىزۋ تالقىلاناتىن تاقىرىپتاردىڭ ءبىرى.
«ازاتتىق» جاڭالىقتارى
