شىمكەنتتە ءدارى- دارمەك شىعاراتىن تاعى ءبىر زاۋىت سالىنادى

شىمكەنت. قازاقپارات - وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ بۇگىن بىرىككەن اراب امىرلىگىنىڭ ۇكىمەت مۇشەسى شەيح حاسسان ابدۋلكاريم حابيب مانسۋر الحەرز مىرزا باستاعان ءبىر توپ وتاندىق كاسىپكەرلەرمەن كەزدەستى.

ەۋروپالىق «BITONFLY» فيرماسى جانە وڭتۇستىك قازاقستاندىق «Нuray pharmaceuticals»  ج ش س مەن «Aquacrystal Croup» كومپانيالارىنىڭ باسشىلارى وبلىس اكىمىنە بىرلەسىپ ىسكە اسىرعالى وتىرعان بيزنەس جوبالارىن تانىستىردى.

بىرلەسكەن كاسىپكەرلىك توپ بيىلعى جىلى شىمكەنتتەن ءدارى- دارمەك پەن مەديتسينالىق قولدانعىش زاتتار شىعاراتىن زاۋىت اشقالى وتىرعانىن جەتكىزدى، دەپ حابارلايدى قازاقپارات ح ا ا ءتىلشىسى. جوبانىڭ قۇنى 34 ميلليون ا ق ش دوللارىن قۇرايدى. ءدارى- دارمەكتىڭ 50 ءتۇرىن شىعارۋعا نيەتتەنىپ وتىرعان كومپانيا باسشىلىعى «تاسساي» يندۋستريالدى ايماعىنان 7 گەكتارعا جۋىق جەر تەلىمىن بەرۋدى ءوتىندى. سونداي- اق ولار شىمكەنت قالاسىنداعى «Sofia Towers» جانە «ارمان» تۇرعىن ءۇي جانە ساۋدا ورتالىقتارىنىڭ قۇرىلىسىن باستاعالى وتىرعانىن باياندادى.

 بىرنەشە جىلدان بەرى قۇرىلىسى توقتاپ تۇرعان قوس كەشەننىڭ ىرگەتاسى الداعى مامىر ايىندا قالانعالى وتىر. كاسىپكەرلەر بۇل جوبالاردى بىرىككەن اراب امىرلىگىمەن بىرلەسىپ ىسكە اسىرادى. قۇرىلىسقا باعىتتالاتىن ينۆەستيتسيانىڭ 60 پايىزىن اراب كاسىپكەرلەرى قۇيماقشى ەكەن. كاسىپكەرلەردىڭ جوبالارىمەن تانىسقان ايماق باسشىسى قولعا الىنعان جوبالاردى اياقسىز قالدىرماي، مەجەلەنگەن مەرزىمدە بىتىرۋگە شاقىردى.

«جوبالارىڭىز جاقسى. ءدارى- دارمەك شىعاراتىن زاۋىتتارىڭىزعا «تاسساي» يندۋستريالدى ايماعىنان جەر بولۋگە كومەكتەسەمىز. د. قونايەۆ داڭعىلىندا بوي كوتەرەتىن «Sofia Towers» تۇرعىن ءۇي كەشەنى مەن ادىربەكوۆ كوشەسىندە ورنالاسقان «ارمان» تۇرعىن كەشەنىن دە مەرزىمنەن كەشەۋىلدەتپەي اياقتاۋ كەرەك. بىرىككەن اراب امىرلىگىندەگى قارجىلىق ۇيىممەن بىرلەسىپ كەلىسىمگە قول قويىپ وتىر ەكەنسىزدەر. ساتتىلىك تىلەيمىز. ەڭ باستىسى - قولعا الىنعان جۇمىس جۇيەلى ءارى ساپالى اتقارىلۋى كەرەك»، - دەدى جانسەيىت قانسەيىت ۇلى.

ءوز كەزەگىندە بىرىككەن اراب امىرلىگىنىڭ ۇكىمەت مۇشەسى شەيح حاسسان ابدۋلكاريم حابيب مىرزا وبلىس اكىمىنە العىسىن ءبىلدىرىپ، جوبالاردى قارجىلاندىرۋدا قولبايلاۋ بولمايتىندىعىن جەتكىزدى.

 «ۋاقىت ءبولىپ ارنايى قابىلداعانىڭىزعا العىسىم شەكسىز. وڭتۇستىك قازاقستان وبلىسىنىڭ الەۋەتىمەن تانىسىپ شىعىپ، كەرەمەت اسەر الدىم. قازاقستاندىق كاسىپكەرلەرمەن بىرىگىپ، وسى وڭىردە ءبىرقاتار جوبالاردى قولعا العالى وتىرمىز. العا قويعان ماقسات- مىندەتتەر جوعارى دەڭگەيدە ورىندالادى دەگەن سەنىم مول»، - دەدى شەيح حاسسان ابدۋلكاريم حابيب مانسۋر الحەرز.

كەزدەسۋ سوڭىندا ايماق باسشىسى اراب ەلىنەن كەلگەن ارنايى قوناق پەن وتاندىق كاسىپكەرلەردى «شىمسيتي» جوباسىمەن تانىستىرىپ، ۇسىنىس- پىكىرلەرى ەسكەرىلەتىنىن جەتكىزدى.

 اۆتور: اينۇر اقبايەۆا