پرەزيدەنتتىڭ وكىلەتتىگىن ءوز ىقىلاسىمەن بەرۋى - تاريحتا سيرەك كەزدەسەتىن وقيعا - بەيسەنبايەۆ

استانا. قازاقپارات - كونستيتۋتسيالىق رەفورما مەملەكەتىمىزدىڭ جاڭا تاريحىن باستايدى جانە حالقىمىزدىڭ بەرەكەسى، ىنتىماعى مەن بەيبىت ومىرىنە كەپىلدىك بەرەدى.

مۇنداي پىكىردى بۇگىن ق ر پارلامەنتى پالاتالارىنىڭ بىرلەسكەن وتىرىسىندا سەنات دەپۋتاتى اسقار بەيسەنبايەۆ ءبىلدىردى، دەپ حابارلايدى قازاقپارات.

 «قازاق ەلى تاۋەلسىزدىكتىڭ شيرەك عاسىرىن ابىرويلى ەڭسەردى. بۇگىن بىرلىگى جاراسقان حالقىمىز بار. الەم ەلدەرى مويىنداعان ەڭسەلى، بەدەلدى مەملەكەتىمىز بار. تاۋەلسىزدىكتىڭ 25 جىلىندا اتقارىلعان جەتىستىكتەردىڭ قازىرگى ساياسي جۇيەنىڭ جەمىسى ەكەندىگى بارىمىزگە انىق. الايدا الەم كوز الدىمىزدا وزگەرىپ جاتىر. اۋمالى- توكپەلى الەم وزگەرىستى قاجەت ەتەدى. وزگەرمەگەن ارتتا قالادى. وسىنى تەرەڭ تۇسىنگەن ەلباسى تاريحي باستاماعا جول اشتى. قازاقستاننىڭ دامۋى ءۇشىن كونستيتۋتسياعا قاجەتتى وزگەرىستەردى ۇسىندى جانە ونى بۇكىل حالىقتىق تالقىلاۋدان وتكىزۋدى تاپسىردى. تالقىلاۋعا قوعامنىڭ بارلىق وكىلدەرى بەلسەنە قاتىستى جانە ۇسىنىستارىن ايتىپ، ۇندەۋدى قولدادى»، - دەدى ول.

 بەيسەنبايەۆتىڭ اتاپ وتۋىنشە، بۇل كونستيتۋتسيالىق رەفورما مەملەكەتىمىزدىڭ جاڭا تاريحىن باستايدى جانە حالقىمىزدىڭ بەرەكەسى، ىنتىماعى مەن بەيبىت ومىرىنە كەپىلدىك بەرەدى. مەملەكەتتىگىمىزدىڭ نەگىزگى تىرەگى - پرەزيدەنتتىك باسقارۋ بيلىگى ساقتالادى.

 «قازاقستاندا پرەزيدەنتتىك باسقارۋ نىسانى ەلىمىزدى ۇلتارالىق ارازدىقتان، ساياسي جانە الەۋمەتتىك داعدارىستان قورعاعانى بارشامىزعا بەلگىلى. سوندىقتان پرەزيدەنتتىك بيلىك نىسانى ەلىمىزدىڭ مەنتاليتەتىنە، حالقىمىزدىڭ سۇرانىسىنا، زامان تالابىن تولىق جاۋاپ بەرەدى. حالىق قولدايتىن پرەزيدەنتتىڭ ءوز وكىلەتتىگىن ءوز ىقىلاسىمەن بەرۋى تاريحتا سيرەك كەزدەسەتىن وقيعا. الەم تاريحىندا زامانىنان وزىپ تۋعان، ەلىنىڭ دامۋىن وزگەرتىپ، قۋاتتى مەملەكەت رەتىندە الەمدىك ارەناعا شىعارعان ساناۋلى عانا ساياسي قايراتكەر بار. ولاردىڭ قاتارىندا الاقانداي سينگاپۋردى الەم الىبىنا اينالدىرعان لي كۋان يۋ، 5- رەسپۋبليكانىڭ نەگىزىن قالاعان شارل دە گولل ، جاڭا تۇرىك ەلىن دامىتقان اتاتۇرىك، ەگەمەندىگىمىزدىڭ شاڭىراعىن كوتەرگەن، تاۋەلسىز ەلىمىزدى كۇللى الەمگە مويىنداتقان، جاڭا قازاق مەملەكەتىنىڭ ارحيتەكتورى نۇرسۇلتان ءابىش ۇلى نازاربايەۆ. سوندىقتان قازاقستاننىڭ تۇڭعىش پرەزيدەنتى ەلباسىمىز نۇرسۇلتان ءابىش ۇلى نازاربايەۆتىڭ تاريحي ءرولىن اتا زاڭىمىزعا بەكىتۋ تۋرالى ارىپتەسىمىز حامەنوۆانىڭ ۇسىنىسىن تولىقتاي قولدايمىن»، - دەدى سەناتور.

 اۆتور: مارلان جيەمباي