پرەزيدەنت پارلامەنتكە كونستيتۋتسيالىق وزگەرىستەردى اشىق ءارى جاريالى تۇردە قاراۋدى تاپسىردى
بۇل تۋرالى بۇگىن پارلامەنت پالاتالارىنىڭ بىرلەسكەن وتىرىسىندا ق ر پرەزيدەنتى نۇرسۇلتان نازاربايەۆ ءمالىم ەتتى، دەپ حابارلايدى قازاقپارات.
«مىناۋ زىمىراپ بارا جاتقان ۋاقىتتان دەر شاعىندا وزۋ قاجەت. بۇل وڭاي ەمەس. كونستيتۋتسيالىق رەفورمالار ءبىزدىڭ قازاقستان قاي باعىتتا جۇرەدى دەگەن سۇراققا ناقتى جاۋابىمىز بولىپ تۇر. ول - دەموكراتيالىق دامۋ باعدارى. ءبىز جاۋاپتى ساتتەردىڭ بارىندە اۋىزبىرشىلىگىمىزدى پاش ەتكەن حالىقپىز. قازىر دە وسى اسىل قاسيەتىمىزدى تانىتۋعا ءتيىسپىز»، - دەدى ەلباسى پارلامەنت پالاتالارىنىڭ بىرلەسكەن وتىرىسىندا سويلەگەن سوزىندە.
«ەل بولاشاعى ءۇشىن ايىرىقشا ماڭىزدى ءىستى ابىرويمەن اتقارارىمىزعا نىق سەنىممەنەن ءتيىستى زاڭ جوباسىن پارلامەنتكە ەنگىزىپ وتىرمىن. ەندى پارلامەنت زاڭ جوباسىن قاراۋدىڭ كۇن ءتارتىبىن مۇقيات ساقتاي وتىرىپ، اشىق جانە جاريالى تۇردە قۇجاتتى قاراۋى قاجەت. ماسەلەگە ەلدىك مۇددە تۇرعىسىنان قاراپ، زاڭدى ۇزاققا سوزباي، قابىلدايسىزدار دەپ مەن كامىل سەنەمىن. جۇمىستارىڭىزعا تابىس تىلەيمىن، نازارلارىڭىزعا راحمەت!» - دەپ ءتۇيدى ءسوزىن مەملەكەت باسشىسى.
ايتا كەتەيىك، مەملەكەت باسشىسى نۇرسۇلتان نازاربايەۆتىڭ بيلىك تارماقتارى اراسىندا وكىلەتتىكتەردى قايتا ءبولۋ جونىندەگى ۇندەۋىنە وراي كونستيتۋتسيالىق رەفورما باستاماسى جالپىحالىقتىق تالقىلاۋدان ءوتتى. كونستيتۋتسيالىق رەفورمانىڭ ماقساتى - دەموكراتيالىق پروتسەستەردى ىلگەرىلەتۋ ارقىلى مەملەكەتتەگى باسقارۋ جۇيەسىنىڭ تيىمدىلىگىن ارتتىرۋ.
وسىنىڭ ارقاسىندا قازاقستانداعى جاعدايدى ودان ءارى جاقسارتۋعا، حالىقتىڭ الەۋمەتتىك- ەكونوميكالىق جاعدايىن كوتەرۋگە مۇمكىندىكتەر تۋاتىن بولادى. بۇنىمەن قوسا، بيلىك تارماقتارى اراسىنداعى تەڭگەرىمدىلىك ساقتالادى. پارلامەنت پەن ۇكىمەت جانە سوت بيلىگى ءوز وكىلەتتىكتەرى اياسىندا، تەڭگەرىمدى جاعدايدا جۇمىس جاسايتىن بولادى.
اۆتور: جاسۇلان جولدىبايەۆ
