دەپۋتاتتار ءمينيستردى قىزمەتىنەن بوساتا الادى - جاقسىبەكوۆ

استانا. قازاقپارات - بيلىك تارماقتارى اراسىندا وكىلەتتىكتەردى قايتا بولگەننەن كەيىن پارلامەنتتىڭ جاڭا قۇرامى سايلانسا، ۇكىمەتتىڭ قۇرامى دا جاڭادان جاساقتالادى.

بۇگىن پارلامەنت پالاتالارىنىڭ بىرلەسكەن وتىرىسىندا ق ر پرەزيدەنت اكىمشىلىگىنىڭ باسشىسى ادىلبەك جاقسىبەكوۆ وسى ءبىر ماڭىزدى وزگەرىس جايىندا ايتىپ بەردى، دەپ حابارلايدى قازاقپارات ءتىلشىسى.

«ۇكىمەتتىڭ قۇرامىن جاساقتاۋ بارىسىندا پرەمەر-مينيستر مەملەكەت باسشىسىنىڭ قاراۋىنا ۇمىتكەرلەردىڭ ءتىزىمىن ۇسىنادى. ءبىراق الدىمەن پارلامەنتپەن كەڭەسىپ الادى. ال سىرتقى ىستەر جانە قورعانىس مينيسترلەرىن پرەزيدەنتتىڭ ءوزى تاعايىندايدى. كونستيتۋتسيالىق رەفورمالار اياسىندا ماڭىزدى ءبىر نورما بار. وعان سايكەس، ۇكىمەت ءوز وكىلەتتىلىكتەرىن جاڭادان سايلانعان پرەزيدەنتتىڭ الدىندا ەمەس، جاڭادان سايلانعان پارلامەنتتىڭ الدىندا تاپسىرادى»، - دەيدى جاقسىبەكوۆ.

ونىڭ ايتۋىنشا، پارلامەنتتىڭ ءاربىر پالاتاسى بەلگىلى ءبىر ءمينيستردىڭ جۇمىسىنا قاناعاتتانباسا، پرەزيدەنتتىڭ اتىنا ۇندەۋ جولداۋ ارقىلى ونى جۇمىستان شىعارا الادى. وندايدا مەملەكەت باسشىسى ءمينيستردى قىزمەتىنەن بوساتادى.

ايتا كەتەيىك، قازىرگى وزگەرىستەر پارلامەنتتىڭ ءرولىن كۇشەيتۋدى كوزدەيدى. ءماجىلىس مۇشەلەرى ۇكىمەتتىڭ قۇرامىن جاساقتاۋعا اتسالىسىپ، مينيسترلەر كابينەتىنىڭ جۇمىسىن باقىلاي الادى.

اۆتور: ارمان اسقاروۆ