قاقىرىعىڭىزدىڭ ءيىسى مەن تۇسىنە قاراپ قانداي دەرتكە شالدىققانىڭىزدى بىلۋگە بولادى

استانا. قازاقپارات - قاقىرىقتىڭ تۇسىنەن، پىشىنىنەن، يىسىنەن، مولشەرىنەن، ادام دەنەسىندە پايدا بولعان اۋرۋلاردىڭ بەلگىسىن بايقاۋعا بولادى.

قاقىرىقتىڭ ءتۇسى:

ساۋ ادامنىڭ قاقىرىعى ءتۇسسىز نەمەسە اقشىل بولادى. ەگەر قاقىرىقتا ونان باسقا ءتۇس پايدا بولسا، ونى بەلگىلى اۋرۋدىڭ بەلگىسى دەپ بىلگەن ءجون.

ايتالىق قاقىرىق جاسىل ءتۇستى بولسا بۇل سارى اۋرۋدان، وكپەنىڭ ۇلكەن ءبولىمى قابىنۋىنان، وكپەنى جاسىل ءىرىڭدى تاياقشا باكتەريانىڭ ينفەكتسيلاۋىنان پايدا بولادى. ال قىزىل ءتۇس قان نەمەسە قان بەلوگىنان پايدا بولۋى مۇمكىن.

مۇنداي بەلگى وكپە راگى، وكپە تۋبۋركۋلەزى، وكپە قان سورعىش قۇرت اۋرۋى، تىنىس جولى كەڭەيۋ، تىنىس جولى قابىنۋ، وكپە جەدەل سۋلى ىسىگى قاتارلى اۋرۋلارعا شالدىققانداردا كوپ بولادى.

قان قىزىل قاقىرىق وكپە تۋبۋركۋلەزىنىڭ العاشقى كەزىندە پايدا بولادى. ال قىزىل كوپىرشىك قاقىرىق جەدەل سۋلى ىسىگىنىڭ بەلگىسى. ەگەر قاقىرىق قارا ءتۇستى بولىپ كەلسە ول ۇزاق ۋاقىت تەمەكى تارتقانداردا نەمەسە شاڭ-توزاڭنىڭ ىشىندە جۇرگەندەردە كوپ بولادى. ال قوڭىر ءتۇستى بولىپ كەلسە ول سوزىلمالى وكپە قانتالاۋ سيپاتتى جۇرەك اۋرۋىنىڭ بەلگىسى.

قاقىرىقتىڭ فورماسى:

جابىسىقاق قاقىرىق. بۇل جابىسقاق ءمولدىر قاقىرىق تىنىس جولىنىڭ جەدەل قابىنۋى، وكپە قابىنۋ، ۆيرۋستىق وكپە قابىنۋ اۋرۋلارىنىڭ بەلگىسى.

ءىرىڭدى قاقىرىق. سارى نەمەسە جاسىل سارى، ءىرىڭ كلەتكالارى مەن ولەتتەنگەن ۇلپالاردىڭ ۇنتاعى مول ىلەسكەن قاقىرىق تىنىس جولى قابىنۋ، وكپە ءىرىڭدى ىسىگى، تىنىس جولى كەڭەيۋ قاتارلى اۋرۋلاردىڭ بەلگىسى.

قاندى قاقىرىق. بۇل وكپە تۋبۋركۋلەزى، تىنىس جولىنىڭ كەڭەيۋى، وكپە ۇلكەن ءبولىمىنىڭ العاشقى قابىنۋى، تىنىس جولىنىڭ سوزىلمالى قابىنۋى، تىنىس جول-وكپە راگى قاتارلى اۋرۋلاردىڭ بەلگىسى.

قاقىرىقتىڭ ءيىسى:

قاندى كۇلىمسى ءيىس وكپە راگى، وكپە تۋبۋركۋلەزى قاتارلى اۋرۋلاردا كەزدەسەدى. وكپە ءىرىڭدى ىسىگى، تىنىس جولى كەڭەيۋ، سوڭعى مەزگىلىنە وتكەن قاتەرلى وكپە وسپەسى قاتارلى اۋرۋعا شالدىققانداردىڭ قاقىرىعى جيركەنەرلىكتەي ساسىق بولادى.

قاقىرىقتىڭ مولشەرى:

قاقىرىقتىڭ بىرتە-بىرتە مولايۋى تىنىس جولىنىڭ جەدەل قابىنۋى اۋرۋىنان پايدا بولادى. ال ايقىن تۇردە مولايۋى تىنىس جولىنىڭ سوزىلمالى قابىنۋى، تىنىس جولى كەڭەيۋ، وكپە ءىرىڭدى ىسىگى، تەسىلۋ سيپاتتى وكپە تۋبۋركۋلەزى، وكپە سۋلى ىسىگى قاتارلى اۋرۋلاردان پايدا بولادى، دەپ جازادى جاسان زەكەي ۇلى جەلىدەگى پاراقشاسىندا.