كوكتەمدە گولوۆكين اتىنداعى سپورت كەشەنى اشىلادى

قاراعاندى. قازاقپارات - قاراعاندى گەننادي گولوۆكين اتىنداعى سپورت كەشەنى اشىلادى. ونداعى سەكسيالار مەن زالداردىڭ بارلىعى تەگىن جۇمىس جاسايدى، دەپ حابارلايدى «قازاقپارات» ح ا ا ءتىلشىسى.

اتقارۋشى بيلىك دەنە شىنىقتىرۋ-ساۋىقتىرۋ كەشەنىنە WBC، WBA، IBF، IBO نۇسقاسى بويىنشا الەم چەمپيونى، كاسىپقوي بوكسشى گەننادي گولوۆكيننىڭ ەسىمىن بەرۋ تۋرالى شەشىم قابىلداعان.

بۇگىن قاراعاندى وبلىسى اكىمىنىڭ ورىنباسارى اسىلبەك دۇيسەبايەۆ سالىنىپ جاتقان دەنە شىنىقتىرۋ-ساۋىقتىرۋ كەشەنىنە باردى. ول جەردە اۋىر اتلەتيكا زالى، باسكەتبول، ۆولەيبول مەن شاعىن-فۋتبولعا ارنالعان امبەباپ سپورت زالى، 25 مەترلىك باسسەين مەن بوكس زالى ورنالاساتىن بولادى.

«نىساندى پايدالانۋعا بەرەر كەزدە جاتتىقتىرۋشىلاردىڭ بارلىق ەسكەرتپەلەرى مەن تىلەكتەرىن ەسەپكە الۋدى تاپسىرامىن. سونداي-اق، بارلىق سپورت زالدارىنىڭ حالىقارالىق ستاندارتتار مەن تالاپتارعا ساي بولۋىن جۇكتەيمىن. بۇل جەردە ءتۇرلى دەڭگەيدەگى سايىستار وتكىزىلەتىن بولادى»، - دەپ مالىمدەدى اسىلبەك دۇيسەبايەۆ سونداي-اق، دۇيسەبايەۆ قۇرىلىس جۇمىستارىن ساپالى ءارى جىلدام جۇرگىزۋدى تاپسىردى.

اتالمىش نىسان «سپورت نىساندارىن دامىتۋ» باعدارلاماسى بويىنشا جۇزەگە اسۋدا. ونىڭ قۇرىلىس جۇمىستارىنا وبلىستىق جانە قالالىق بيۋدجەتتىڭ قارجىلارى كەزەڭ-كەزەڭىمەن بولىنۋدە. سپورت كەشەنىنىڭ اشىلۋى اعىمداعى جىلدىڭ كوكتەمىنە جوسپارلانۋدا.

وتكەن جىلدىڭ قىركۇيەك ايىندا قۇرىلىس الاڭىنا بوكسشى گەننادي گولوۆكين كەلگەن ەدى. ول قۇرىلىسشىلارعا سپورت كەشەنىنە كەلۋشىلەردىڭ جاعدايىن جاساۋعا جانە جاتتىعۋلارىن ويداعىداي وتكىزۋ ءۇشىن ءبىرقاتار تالاپ-تىلەكتەرىن اتاپ ءوتتى.