ازاماتتاردى سالماقتى نەگىزدەرسىز جانە بۇلتارتپايتىن دالەلدەرسىز تۇتقىنداۋعا بولمايدى - نازاربايەۆ
كەزدەسۋدە قايرات قوجامجاروۆ ەلباسىنى اگەنتتىكتىڭ قازىرگى قىزمەتى تۋرالى حاباردار ەتىپ، "100 ناقتى قادام" ۇلت جوسپارىن ىسكە اسىرۋ اياسىندا اتقارىلىپ جاتقان جۇمىستار جونىندە باياندادى.
نۇرسۇلتان نازاربايەۆ ورتالىق مەملەكەتتىك جانە جەرگىلىكتى اتقارۋشى ورگاندارداعى بوس تۇرعان ورىنداردى قىسقارتۋ، سونداي-اق ەڭبەكاقى تولەۋ قورىنىڭ قاراجاتىن قايتا ءبولۋ ارقىلى ەنگىزىلىپ جاتقان مەملەكەتتىك قىزمەتشىلەردى ىنتالاندىرۋدىڭ بونۋستىق جۇيەسىنىڭ ماڭىزدىلىعىن اتاپ ءوتتى.
قايرات قوجامجاروۆ "ب" كورپۋسىنداعى مەملەكەتتىك قىزمەتشىلەردى اتتەستاتسيالاۋ بارىسى تۋرالى حابارلاپ، اتتەستاتسيادان وتۋشىلەر جاقسى ناتيجە كورسەتىپ جاتقانىن ايتتى. اگەنتتىك ءتوراعاسىنىڭ اقپاراتى بويىنشا، بۇگىنگە دەيىن جوعارى اتتەستاتسيالىق كوميسسيانىڭ 14 وتىرىسى بولىپ، رەسپۋبليكالىق دەڭگەيدە 700-دەن استام قىزمەتكەر اڭگىمەلەسۋدەن وتكەن. سونداي- اق، اگەنتتىك ءتوراعاسى "ا" باسقارۋشى كورپۋسىن رەفورمالاۋعا قاتىستى ۇسىنىستار جونىندە باياندادى.
وندا قىزمەتكەرلەردىڭ وسى ساناتىنا جاتاتىن لاۋازىمدار قاتارىن قىسقارتۋ كوزدەلگەن. قازاقستان پرەزيدەنتى سىبايلاس جەمقورلىقپەن كۇرەسۋ، ۇدايى ونىڭ الدىن الۋ جۇمىسىن ساپالى جۇرگىزۋ قاجەتتىگىنە دە نازار اۋداردى. "قىلمىستىق قۋدالاۋ تەك زاڭ اياسىندا عانا جۇزەگە اسىرىلۋعا ءتيىس. ازاماتتاردى سالماقتى نەگىزدەرسىز جانە بۇلتارتپايتىن دالەلدەرسىز تۇتقىنداۋعا بولمايدى"، - دەدى نۇرسۇلتان نازاربايەۆ. مەملەكەت باسشىسى كەزدەسۋ قورىتىندىسى بويىنشا ءبىرقاتار ناقتى تاپسىرما بەردى.
