ايدوس سارىم: قوعامنىڭ الاڭداۋشىلىعىنا پرەزيدەنتتىڭ شەشىمى ارقىلى ناقتى جاۋاپ بەرىلدى
«ەگەمەن قازاقستان» گازەتىنە بەرگەن شاعىن سۇحباتىندا بەلگىلى ساياساتتانۋشى ايدوس سارىم وسىلاي دەگەن ەكەن. گازەت ءتىلشىسى پرەزيدەنتتىڭ اقورداداعى جۇمىس توبىمەن وتكىزگەن قورىتىندى وتىرىسىنا قاتىستى پىكىر سۇراعان بولاتىن.
وسىعان وراي ساياساتتانۋشى ەلىمىزدەگى مۇلىك ماسەلەسىنە، ونىڭ ۇستىنە، وتكەن جىلعى جەر ماسەلەسىنە قاتىستى ميتينگىلەردىڭ اسەرى بولار، ءبىراز الاڭداۋشىلىق، ءتىپتى، ءبىراز تولقۋ دا بولعانىن ايتادى.
«ءبىرقاتار بەدەلدى ازاماتتار قىزدى-قىزدىمەن قاتتى-قاتتى اڭگىمەلەر دە ايتىپ قالدى. اسىقپاي وتكىزىلگەن قوعامدىق تالقىلاۋلاردىڭ بارىسىن، بارلىق جاعدايىن ەسكەرىپ، كۇنى كەشە ەلباسىمىز قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆ بۇل ماسەلەنى ودان ءارى قوزعاۋدىڭ قاجەتى جوق، 26-باپ بۇرىنعى نۇسقاسىندا قالسىن دەپ، وزگەرىس ەنگىزبەۋدى ۇسىندى. بۇل ءبىزدىڭ ەلىمىزدەگى ازاماتتىق قوعامنىڭ، زيالى قاۋىمنىڭ پىكىرىنە، الاڭداۋشىلىعىنا تۇسىنىستىكپەن قاراپ، ناقتى رەاكتسيا بەرۋ، ءۇن قاتۋ دەپ ويلايمىن. جانە دە بۇل بيلىكتىڭ دە، ازاماتتىق قوعامنىڭ دا جاۋاپكەرشىلىگىنىڭ ۋاقىت تالابىنا ساي ارتقانىنىڭ بەلگىسى دەر ەدىم»، - دەپ جاۋاپ بەرەدى.
ساياسات تانۋشىنىڭ پايىمىنشا، نەگىزىنەن بۇكىل ماسەلە، تالاپ ەتىلگەن كونستيتۋتسيالىق وزگەرىستەر تۋرالى اڭگىمە بيلىك وكىلەتىكتەرىنىڭ ءتيىستى تارماقتارىنا قاتىستى بولىپ وتىر. ال قالعان باپتارى بۇرىنعى قازاقستان رەسپۋبليكاسى كونستيتۋتسياسىنىڭ 1995-جىلعى رەفەرەندۋمدا قابىلدانعان كۇيىندە قالماق دەگەن ءسوز. «تالقىلاۋ كەزىندە ەلدىڭ نازارى «اركىم» دەگەن سوزگە اۋىپ، ونىڭ كولەڭكەسىندە شەتەلدىكتەرگە دەگەن ويدىڭ استاسقانى راس.
جەر جانە باسقا دا ماسەلەلەرگە تۇپكىلىكتى ەكونوميكالىق ماسەلە شەشىلمەي بارۋدىڭ ەرتە ەكەندىگى دە بۇعان دەيىن سان رەت ايتىلدى. موراتوري قويىلدى. سول سەبەپتى دە، حالىقتىڭ ىشىندە، قوعامدىق ورتادا وسىدان سوڭ دا بيلىك سول بۇرىنعى اڭگىمەسىن قايتادان باستاپ كەتە مە دەگەن قورقىنىشتىڭ بولعانى دا اقيقات. پرەزيدەنتتىڭ كەشەگى جۇمىس توبىمەن بولعان باسقوسۋىندا مۇنىڭ بارلىعىنا ناقتى جاۋاپ بەرىلدى دەپ ويلايمىن. ەندىگى جەردە بارلىق ماسەلە بيلىكتىڭ وكىلەتتىكتەرىنە جانە ونىڭ باسقا دا سالالاس تارماقتارىنا قاتىستى بولادى»، - دەيدى ايدوس سارىم.
اۆتور: قانات مامەتقازى ۇلى