سەناتورلار ەكولوگيالىق كودەكسكە ەنگىزىلەتىن تۇزەتۋلەردى تالقىلادى

استانا. قازاقپارات - پارلامەنت سەناتى اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ كەڭەيتىلگەن وتىرىسىندا «قازاقستان رەسپۋبليكاسىنىڭ ەكولوگيالىق كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭىنىڭ جوباسى ءبىرىنشى وقىلىمدا قارالدى.

زاڭ جوباسى ەلىمىزدەگى قولدانىستاعى ەكولوگيالىق زاڭنامانى جەتىلدىرۋگە جانە ونى قۇقىق قولدانۋ پراكتيكاسى كەزىندە انىقتالعان قۇقىقتىق ولقىلىقتاردى جويۋعا باعىتتالعان.

قۇجات قورشاعان ورتاعا ەلەۋلى اسەر ەتپەيتىن نىساندار جونىندە جوبالىق قۇجاتتار بويىنشا قوعامدىق تىڭداۋلار وتكىزۋ قاجەتتىگى تۋرالى ەرەجەلەردى الىپ تاستاۋدى كوزدەيدى.

تۇرمىستىق قاتتى قالدىقتاردى الدىن الا وڭدەۋ جاساماي پوليگوندارعا قابىلداۋ مەن كومۋگە تىيىم سالاتىن ەكولوگيالىق كودەكس ەرەجەلەرىن قولدانىسقا ەنگىزۋ مەرزىمدەرى وزگەرەدى.

قورشاعان ورتانى قورعاۋ سالاسىنداعى ۋاكىلەتتى ورگاننىڭ پارنيكتىك گازدار شىعارىندىلارى كۆوتانى ءونىم بىرلىگىنە شاققاندا ءبولۋ ماقساتىندا پارنيكتىك گازداردىڭ ۇلەستىك دارەجەلەرىنىڭ تىزبەسىن ازىرلەۋ جانە بەكىتۋ بولىگىندەگى قۇزىرەتى ناقتىلانادى.

وزگەرىستەر سونداي-اق سارقىندى سۋلاردى تابيعي جانە جاساندى سۋ وبەكتىلەرىنە اعىزۋدى رەتتەۋ بويىنشا نورمالاردى ناقتىلاۋدى دا كوزدەيدى. زاڭ جوباسى پالاتانىڭ قاراۋىنا جىبەرىلدى.