جاسى الپىستى القىمداسا دا سۇلۋلىعىن جوعالتپاعان جۇلدىزدار

استانا. قازاقپارات - ءوز جاسىنان جاس كورىنۋ كەز كەلگەن ايەلدىڭ ارمانى. ول ءۇشىن ءبارىمىز دە قولىمىزدان كەلگەندى ىستەۋگە تىرىسامىز.

ءمىنسىز ءمۇسىندى ساقتاۋ ءۇشىن قاتاڭ ديەتا، تۇراقتى سپورت جانە دامىعان زامان تەحنولوگياسى كومەككە كەلەدى دەپ بىلەمىز. Ikerim.kz پورتالى ءوز جاسىنان الدەقايدا جاس، سۇلۋ كورىنەتىن جۇلدىزداردى ۇسىنادى.

بيبىگۇل تولەگەنوۆا

«قازاقتىڭ بۇلبۇلى» اتانعان دارا ءانشى، 87 جاستا. ونىڭ سۇلۋلىعىنا تامساناتىنداردىڭ شەگى جوق شىعار، ءانشىنىڭ ءوزى «ادەمى كورىنۋدىڭ - ءوزى ونەر» دەپ ەسەپتەيدى. سۇلۋلىعىنىڭ قۇپياسىن سۇراعان جۋرناليستەرگە: «ەشقانداي قۇپياسى جوق. بىرىنشىدەن، جاراتىلىستىڭ سىيى.

سونىمەن قاتار، ءار ادامنىڭ ىشكى جانى تازا بولۋ كەرەك. ادەمى بولۋ ءۇشىن، بار بولعانى، ەرىنشەكتىككە جول بەرمەۋ كەرەك. جاسىنا قاراماستان، ايەل ادام ادەمى بولىپ ءجۇرۋى ءتيىس. مەن تاڭەرتەڭ بەتىمدى سالقىن جانە ىستىق سۋمەن شايامىن. ساپالى كرەمدەر جاعامىن.

بار بولعانى وسى. وزىڭىزگە اينالاداعى جاندار جاعىمدى اسەر قالدىرۋ ءۇشىن ادەمى بولىپ ءجۇرۋ ماڭىزدى. جاقسى كوڭىل-كۇيدىڭ كىلتى ادەمى بولىپ جۇرۋدە دەپ بىلەمىن» - دەپ جاۋاپ بەرگەن ەكەن.

باعدات سامەدينوۆا

ق ر- نىڭ ەڭبەك سىڭىرگەن ءارتىسى وسى جىلى 63 كە تولدى. ۇنەمى كوڭىلدى جۇرەتىن ءانشى قيىندىققا تاپ بولماۋ ءۇشىن اشۋعا بوي الدىرماۋ كەرەك دەيدى. «جۇمىسىم كوپ بولسا دا، بەتىمە ماسكا جاساپ، كرەم جاقپاي جاتپايمىن» - دەگەن ءانشى ايەل ۇنەمى وزىنە كۇتىم جاساۋى كەرەك دەيدى.

مەرۋەرت وتەكەشوۆا

قازاقتىڭ «قىز جىبەگى» اتانعان اكتريسا 66 جاستا. كينودا دا، ومىردە دە تولەگەن ماحابباتىن ارناعان اكتريسا ءبىزدىڭ «ماحاببات» سيمۆولىمىز سەكىلدى.

ناعيما ەسقاليەۆا

ءانشى وسى جىلى 63 كە اياق باستى. ءاردايىم بەلسەندى، كوڭىلدى جۇرەتىن ناعيما حانىم ديەتا ارقىلى سالماعىن باقىلايتىنعا ۇقسايدى. سونىمەن قاتار سپورتپەن دە شۇعىلدانادى.

ايجان نۇرماعامبەتوۆا

ءوزىنىڭ ەرەكشە ستيلىمەن كوزگە تۇسەتىن ءانشى جازدا 61 جاسقا تولادى. دەسە دە، ءالى جاپ-جاس ءارى وزگەشەلىكتى قالايتىن ءانشى سپورتقا دا، جاڭا تەحنولوگيالارعا جۇگىنبەي سۇلۋ قارتايىپ ءجۇر ەكەن. ءتىپتى اللەرگياسى بولعاندىقتان، كرەمدەردى دە قولدانبايتىن كورىنەدى. ءبىراق ونىڭ تالعامى قاشاندا دارالانىپ تۇرادى.

روزا رىمبايەۆا

قازاق ەستراداسىنىڭ پريمادونناسى وسى جىلى 60 قا كەلەدى. 40 جىل حالىقتىڭ الدىندا جۇرگەن ءانشىنىڭ وسى ۋاقىت ارالىعىندا ءوزى دە، وبرازى دا كوپ وزگەرگەن جوق. سول باياعىداي تالدىرماش ءمۇسىن، ۇستامدى كورسەتەتىن كيىم، ءتىپتى بويانعان كەزدە دە شەكتەن شىعىپ كەتپەيدە ەكەن. دەگەنمەن ۇزىنقۇلاقتان ەستۋىمىز بويىنشا ءانشى ءسان سالوندارىنا ءجيى باس سۇعادى.