روزا رىمبايەۆا ەندى اكتريسالىق قىرىمەن تانىلماق
ەندى مىنە ءانشى تاعى دا ءوزىنىڭ اكتەرلىك قىرىن سىناپ كورمەك.
بۇل تۋرالى «تاڭشولپان» باعدارلاماسىندا ايتىلدى.
ناۋرىزدىڭ 2- كۇنى استانا قالاسىنىڭ تورىندە «راحمەت، ساعان بابالارىم» اتتى قويىلىم- كونسەرت وتەدى. اتالعان ميۋزيكل جانرىنداعى قويىلىم ايگۇل يمانبايەۆا مەن اقىن نازگۇل سارىبايەۆانىڭ باستاماسىمەن قويىلماق. ال باستى رولدەردى روزا رىمبايەۆا، بولات ءابىلمانوۆ، اسىلحان تولەپوۆ سىندى اكتەرلەر سومدايدى. العاشقىسىنىڭ تەاتردا ونەر كورسەتۋى - حالىق ءۇشىن كۇتپەگەن جاڭالىق. دەسە دە، ءانشى مۋزىكالىق دراما سالاسىندا كاسىبي ءبىلىم العان.
«جالپى مۇنداي ۇلكەن جوباعا مونولوگ ايتاتىن اكتريسا رەتىندە العاش رەت قاتىسىپ وتىرمىن. الايدا ايگۇلدىڭ وسى سىندى جوباسىنا بۇرىن ات سالىسقانمىن. ساحناعا تەك ءانشى بولىپ شىقپايسىڭ، بەلگىلى ءبىر كەيىپكەردى سومدايسىڭ. سول سەبەپتى ۇلكەن جاۋاپكەرشىلىكتى سەزىنىپ وتىرمىن. ارتىنشا مۋزەيگە كەلگەن جاستارعا قازاق حالقىنىڭ كورىنىستەرى قويىلعان ستەندىنى تانىستىرامىن. تاريحىمىزعا جاستار ءۇڭىلىپ، بىلە تۇسسە ەكەن دەگەن نيەت بار.
مۋزەيگە ەرتەرەكتە پايدالانىلعان جادىگەرلەر قويىلعان. ولار ارقىلى ۇلتىمىزدىڭ قالاي ءومىر سۇرگەنىن، قانداي قۇرالداردى پايدالانعانىن بىلۋىمىزگە بولادى. قيلى زاماندار تۋرالى تەك كىتاپتان ەمەس، مۋزەيدەن دە بىلۋىگە بولادى. وسىلايشا مۋزەي قىزمەتكەرى بولىپ، جاستارعا ەكسكۋرسيا جۇرگىزەمىن. ارتى انگە ۇلاسادى. ماقساتىم - ءبىر جاعىنان ءانشى، ءبىر جاعىنان اكتريسا بولىپ، كورەرمەننىڭ كوڭىلىنەن شىعىپ، تاريحىمىز بەن ءداستۇرىمىزدى بىلمەيتىن جاستاردىڭ كوزىن اشۋ. مۇنىمەن قاتار، كەلگەن جاستاردىڭ بارلىعى دا سول جەردە بەلگىلى ءبىر رولدەردى سومدايدى. ءتىرى كەيىپكەرگە اينالىپ، مونولوگ وقيدى. جەكە ءوزىم شەكسىز قۋانىشتىمىن. تەلەديداردان بولسىن مىندەتتى تۇردە قاراپ شىعىڭىزدار. سانا- سەزىمدەرىڭىز بەن ۇعىم- تۇسىنىكتەرىڭىزدى كەڭەيتەدى»، - دەيدى روزا قۋانىش قىزى.
ءانشى باستى ءرولدى سومدايتىن قويىلىم بۇگىن استانانىڭ ورتالىق قازاقستان زالىندا كورسەتىلەدى. مۇنىمەن قاتار، ول ەلىمىزدىڭ باس قالاسىنا كەلگەن قوناقتاردى مادەني وشاقتاردى مىندەتتى تۇردە ارالاۋعا شاقىردى. «استاناعا كوپتەگەن قوناق كەلەدى. اراسىندا قازاقستاندىقتاردان بولەك شەتەلدىكتەر دە بار. مىندەتتى تۇردە تەاترعا، كونسەرت زالدارىنا بارۋدى ۇمىتپاڭىزدار. وزدەرىڭىز ءۇشىن جاڭالىق پەن رۋحاني دۇنيەنىڭ كوزىن اشىپ قايتىڭىزدار. ونىڭ ۇستىنە ءقازىر استانامىزداعى بارلىق تەاتر مەن قويىلىم جاڭا»، - دەيدى ءانشى.
