11:10, 02 - ناۋرىز 2017 | GMT +5
ەكسپو اۋماعىندا دەكوراتيۆتى نىساننىڭ وپىرىلىپ ءتۇسۋىنىڭ ناقتى سەبەبى انىقتالدى
استانا. قازاقپارات - ەكسپو اۋماعىندا دەكوراتيۆتى شاتىر قۇرىلىسى قۇلاۋىنىڭ سەبەبى انىقتالدى. بۇل تۋرالى ق ر ىشكى ىستەر ءمينيسترى قالمۇحانبەت قاسىموۆ ءمالىم ەتتى، دەپ حابارلايدى قازاقپارات.
«ساراپتاما ناتيجەسى شىقتى. ونى جاريالايمىز. باسىندا مەتالل دەپ ەدى، ءبىراق مەتالل (ساپاسى) دۇرىس بولعان، دانەكەرلەۋشىلەر دۇرىس ىستەمەگەن»، - دەدى بۇگىن مينيستر سەناتتا جالپى وتىرىس بارىسىندا تىلشىلەر ساۋالىنا جاۋاپ بەرە وتىرىپ.
وزدەرىڭىز بىلەتىندەي، 2016 -جىلدىڭ قاراشاسىندا كورمە اۋماعىنداعى دەكوراتيۆتى نىسان ورتاسىنان وپىرىلىپ تۇسكەن ەدى. قۇرىلىسشىلار وقيعانى ۆيدەوعا ءتۇسىرىپ الىپ، الەۋمەتتىك جەلىدە تاراتقان بولاتىن. تاۋەلسىز ساراپشىلار «دەكوراتيۆتى كوپىر مەردىگەر تاڭداعان ساپاسىز مەتالدان سالىنعان جانە ول مەتالل ايازعا شىداماي قۇلادى» دەگەن قورىتىندى شىعاردى.
