ورالدا «باقىتتى ايەلدەر» ماراپاتتالدى - فوتو
سالتاناتتى راسىمگە قاتىسقان وبلىس اكىمى التاي كولگىنوۆتىڭ اتاپ وتكەنىندەي، تالاي قيىن كەزەڭدى باستان وتكەرگەن قازاق حالقى ەلىمىزگە جەر اۋدارىلىپ نەمەسە باسقا دا سەبەپتەرمەن كەلگەن ءتۇرلى ۇلت وكىلدەرىن شەتكە قاقپاي، قوناقجايلىلىقتىڭ تورەسىن كورسەتىپ، تورىنە وزدىردى.
سونىڭ ارقاسىندا قازىرگى تاڭدا قازاقستاندا 130 دان استام ۇلت وكىلدەرى تاتۋ- ءتاتتى عۇمىر كەشۋدە. بۇل - حالىقتى بىرلىك پەن ىنتىماققا، قوعامدىق كەلىسىمگە شاقىرىپ، ىزگى ماقساتقا جەتەلەگەن ەلباسىنىڭ ساليقالى ساياساتىنىڭ ناتيجەسى. اتالمىش بايقاۋدىڭ العىس ايتۋ كۇنىمەن تۇسپا- تۇس كەلۋى دە تەگىن ەمەس. ويتكەنى وسىنداي شارالاردى ۇيىمداستىرا وتىرىپ، ءبىز ارداقتى انالارعا، قىمباتتى اپا- قارىنداستارعا، بارشا ارۋلارعا قۇرمەت كورسەتەمىز.
«ايەل ءبىر قولىمەن بەسىكتى، ەكىنشى قولىمەن الەمدى تەربەتەدى» دەگەندەي، ۇرپاعى ءۇشىن جانىن سالاتىن ايەل-انانىڭ ومىردەگى ورنى ولشەۋسىز ەكەندىگى انىق. سونىڭ ىشىندە مۇمكىندىگى شەكتەۋلى جاندارعا مەملەكەت تاراپىنان عانا ەمەس، وعان قوسا كاسىپكەرلەردىڭ الەۋمەتتىك جاۋاپكەرشىلىگى اياسىندا قولداۋ جاسالا بەرمەك.
ەندى كوكتەمنىڭ العاشقى كۇنىنەن باستاپ قولعا الىنعان «مەيىرىمدى كوكتەم» جوباسىنا سايكەس جەتىم بالالارعا جاردەم بەرىلمەكشى. مۇنداي شارالار تەك كوكتەممەن شەكتەلمەيدى، جىل بويى جالعاسادى. 
جيىندا سونداي- اق اقىن، قازاقستان جازۋشىلار وداعى بقو بولىمشەسىنىڭ ءتورايىمى، حالىقارالىق «الاش» ادەبي سىيلىعىنىڭ يەگەرى اقۇشتاپ باقتىگەرەيەۆا كوكتەم قاناتىمەن ىلەسە كەلگەن مەيرام كۇنى ايەلدەر قاۋىمىنا كورسەتىلىپ وتىرعان قۇرمەتتىڭ ءمان- ماڭىزى ەرەكشە ەكەندىگىن جەتكىزدى. 
سونىمەن، «باقىتتى ايەل - قوعام ايناسى» بايقاۋىنىڭ قورىتىندىسىنا سايكەس تەرەكتى اۋدانى اقسۋات اۋىلدىق وكرۋگىنىڭ اكىمى ليۋبوۆ ەسقاليەۆا، ءبىلىم سالاسىندا 45 جىلدان استام ۋاقىت ەڭبەك ەتكەن باتىس قازاقستان يننوۆاتسيالىق- تەحنولوگيالىق ۋنيۆەرسيتەتى پەداگوگيكا فاكۋلتەتىنىڭ دەكانى بايان جۇماقايەۆا، التى بالانىڭ اناسى ءسابيرا ەروليەۆا، دەنساۋلىق ساقتاۋ سالاسىنان دارىگەر تاتيانا شكولنايا، «اربا» قوعامدىق بىرلەستىگىنىڭ ءتورايىمى گۇلميرا باتپاقۇلوۆا، پروكۋراتۋرا سالاسىنىڭ تاجىريبەلى قىزمەتكەرى جانار نۇرماعامبەتوۆا، زەلەنوۆ اۋدانى ماحامبەت اۋىلىنان كەلگەن كاسىپكەر جاڭىلسىن يسقاقوۆا، جۋرناليست، اقىن ۇلداي ساريەۆا، قارجىگەر ءاديا دوسانوۆا، اۋىل جاناشىرى مارينا شامشيتوۆا، الەۋمەتتىك قىزمەتكەر جۇپار جۇباندىقوۆا، ءبيشى، «قىزعالداقتار» ءبي ءانسامبلىنىڭ جەتەكشىسى رايحان كوجەكەشيەۆا ءتۇرلى اتالىمدار بويىنشا ۇزدىك اتاندى.
ب ق و بويىنشا ىسكەر ايەلدەر قاۋىمداستىعىنىڭ ءتورايىمى ءلاززات رىسبەكوۆانىڭ ايتۋىنشا، قازاقستاندا اتالمىش قاۋىمداستىق قۇرامىندا 15 مىڭنان استام مۇشە بار. ولار ءومىردىڭ ءتۇرلى سالاسىندا جەمىستى ەڭبەك ەتۋدە. 
اۆتور: ەلجان ەرالى
