ورالدا قازاقتىڭ ءۇش بىردەي باتىر قىزىنا ەسكەرتكىش ورناتىلادى

ورال. قازاقپارات - باتىس قازاقستان وبلىسى ورال قالاسىندا قازاقتىڭ ءۇش بىردەي باتىر قىزى، كەڭەس وداعىنىڭ باتىرلارى مانشۇك مامەتوۆا، ءاليا مولداعۇلوۆا جانە حالىق قاھارمانى حيۋاز دوسپانوۆاعا ەسكەرتكىش ورناتىلادى، دەپ حابارلايدى «قازاقپارات» ح ا ا ءتىلشىسى.

وبلىستىق مادەنيەت، مۇراعاتتار جانە قۇجاتتاما باسقارماسىنىڭ باسشىسى داۋلەتكەرەي قۇسايىنوۆتىڭ ايتۋىنشا، بۇل ماسەلە 2015 -جىلى ۇلى جەڭىستىڭ 70 جىلدىعىنا وراي كوتەرىلگەن بولاتىن. سونىڭ ءساتى بيىل ءتۇسىپ وتىر. ارنايى كوميسسيا بەلگىلى ءمۇسىنشى نۇرلان دالبايدىڭ جوباسىن تاڭداپ الدى. بيىكتىگى بەس مەترگە جەتەتىن كومپوزيتسيادا ورتادا مانشۇك مامەتوۆا، ەكى جاعىندا ءاليا مولداعۇلوۆا مەن حيۋاز دوسپانوۆانىڭ بەينەلەرى سومدالعان. قازىرگى كەزدە استانادا قولادان قۇيىلىپ جاتقان ەسكەرتكىشتى ورناتۋ جۇمىسىنا وبلىستىق بيۋدجەتتەن 139 ميلليون تەڭگە قارالعان. كومپوزيتسيا م. مامەتوۆا ەسكەرتكىشى تۇرعان الاڭعا ورناتىلادى. ال مانشۇكتىڭ ەسكەرتكىشى قالپىنا كەلتىرىلىپ، باتىر قىزدىڭ تۋعان جەرى بوكەي ورداسى نەمەسە جانىبەك اۋدانىنىڭ بىرىنە قويىلادى.

اۆتور: ەلجان ەرالى