اعىلشىن تىلىنە رەسمي مارتەبە بەرۋدى ۇسىنعاندار دا بار - جاقسىبەكوۆ

استانا. قازاقپارات - قازاقستاندا اعىلشىن تىلىنە رەسمي مارتەبە بەرۋ ۇسىنىلدى.

بۇل تۋرالى بۇگىن اقوردادا ەلباسى نۇرسۇلتان نازاربايەۆتڭ توراعالىعىمەن ءوتىپ جاتقان بيلىك تارماقتارى اراسىنداعى وكىلەتتىكتەردى قايتا ءبولۋ جونىندەگى جۇمىس توبىنىڭ كەزەكتى وتىرىسىندا ق ر پرەزيدەنتى اكىمشىلىگىنىڭ باسشىسى، جۇمىس توبىنىڭ جەتەكشىسى ادىلبەك جاقسىبەكوۆ ءمالىم ەتتى، دەپ حابارلايدى قازاقپارات.

ونىڭ ايتۋىنشا، كونستيتۋتسيا وزگەرتۋلەرىن تالقىلاۋ جونىندەگى جۇمىس توبى كەلىپ تۇسكەن بارلىق ۇسىنىستارى بىرنەشە بلوكقا جۇيەلەگەن. «مەملەكەت باسشىسىنىڭ مارتەبەسى مەن وكىلەتتىگىن ايقىندايتىن بولىمگە 40 تان استام ۇسىنىس ءتۇستى. رەفورما ماقساتى پرەزيدەنت وكىلەتتىگىن قايتا ءبولۋ بولعاندىعىنا قاراماستان كوپتەگەن ادام مەملەكەت باسشىسىنىڭ وكىلەتتىگىن كۇشەيتۋدى ۇسىندى. پرەزيدەنتتىك ۆەرتيكالدىڭ السىرەۋىنە قارسىلىق تانىتقاندار دا بولدى. پارلامەنت وكىلەتتىگىنە قاتىستى 88 ۇسىنىس كەلىپ ءتۇستى. تولىقتاي العاندا، ازاماتتار ۇكىمەتتى جاساقتاۋ بارىسىندا پارلامەنت ءرولىن كۇشەيتۋ قاجەتتىگىن قولدايدى. ءتىپتى، ادامدار پارلامەنتتىك رەسپۋبليكاعا كوشۋدى دە ۇسىندى. پارلامەنتتى جاساقتاۋ ءتارتىبىن وزگەرتۋدى ۇسىنعاندار دا بولدى. اتاپ ايتقاندا، ءماجىلىس دەپۋتاتتارىن ءبىر مانداتتىق وكرۋگ بويىنشا سايلاۋ نەمەسە پارلامەنتتى ءبىرپالاتالى ەتۋ دە ۇسىنىلدى. دەپۋتاتتىق كورپۋسقا تالاپتى كۇشەيتىپ، ءبىر رەتتەن ارتىق سايلانۋىن شەكتەۋ، ءماجىلىس جانە سەنات دەپۋتاتتارىنىڭ جاس سەنزۋراسىن ارتتىرۋ تۋرالى دا ايتىلدى. ۇكىمەتتىڭ مارتەبەسى مەن قىزمەتى بويىنشا ۇسىنىستار نەگىزىنەن ونىڭ پارلامەنت الدىنداعى ەسەپتىلىگىن كۇشەيتۋگە قاتىستى بولدى. ءسوز ۇكىمەتتىڭ بارلىق قۇرامىن ماجىلىسمەندەرمەن مىندەتتى تۇردە كەلىسۋ جايىندا بولىپ وتىر»، - دەدى جۇمىس توبىنىڭ جەتەكشىسى.

ونىڭ سوزىنە قاراعاندا، ەڭ كوپ ۇسىنىس قۇقىق قورعاۋ جانە سوت بلوگىنا قاتىستى تۇسكەن. ولاردىڭ سانى - 2148. سونداي- اق كونستيتۋتسيانىڭ 26 -بابىنا دا قاتىستى ۇسىنىستار مول بولدى. «بۇل ماسەلەگە قاتىستى اشىق پىكىرتالاس بولدى. پىكىرلەر ءارتۇرلى. ازاماتتاردىڭ ءبىر بولىگى بۇل نورمانى وڭ باعالاپ وتىر نەمەسە وزدەرىنىڭ رەداكسيالارىن ۇسىنادى. دەگەنمەن، كوپشىلىگى 26 -باپقا وزگەرتۋ ەنگىزۋبەۋدى سۇراۋدا. سونىمەن قاتار مەملەكەتتىك ءتىلدىڭ ءرولىن كۇشەيتۋ، اعىلشىن تىلىنە رەسمي مارتەبە بەرۋ سىندى ۇسىنىستار دا بار»، - دەدى جاقسىبەكوۆ.

اۆتور: مارلان جيەمباي