اقتوبەدە لاپاروسكوپيالىق ادىسپەن باۋىر الماستىرۋ وپەراتسياسى جاسالدى
اناسىنىڭ ومىرىنە قاۋىپ تونگەننەن كەيىن 23 جاستاعى قىزى دونور بولاتىنىن ايتقان. اقتوبە وبلىستىق اۋرۋحاناسىندا باۋىر ترانسپلانتولوگياسى وتكەن جىلدان باستاپ قولعا الىندى. بىلتىر 6 سىرقاتقا تۋىسى دونور بولىپ، وپەراتسيا ءساتتى اياقتالدى.
بارلىق وپەراتسيانىڭ باسى- قاسىندا سەۋل ۇلتتىق مەديتسينالىق ۋنيۆەرسيتەتىنىڭ پروفەسسورى ۆونگ لي ءجۇردى. وڭتۇستىك كورەيا ماماندارى مەن اقتوبە دەنساۋلىق ساقتاۋ باسقارماسى اراسىندا ارنايى مەموراندۋم بار. قازىرگى تاڭدا وڭىردە باۋىردىڭ اۋىر دەرتىمەن 60 ادام ەسەپتە تۇر. سونداي- اق بيىل وبلىستا العاش رەت پەدياتريا سالاسىندا ترانسپلانتولوگيا وپەراتسياسى جاسالادى دەپ جوسپارلانىپ وتىر.
ەرلان سۇلتانگەرەيەۆ، وبلىستىڭ باس حيرۋرگى:
- بۇگىنگى وپەراتسيانىڭ ەرەكشەلىگى D3 لاپاروسكوپيالىق ادىسپەن جاسالىپ جاتقان وپەراتسيا. ويتكەنى دونور بولعان ادام 23 جاستاعى قىز بالا. ونىڭ ءومىرى ءالى الدا. سوندىقتان تىلىك جاساماي، تىرتىق بولماۋى ءۇشىن بىزدەر مينينۆازيۆتى وپەراتسيا جاساۋعا تۋرا كەلدى.
www.24.kz
