رەسەي قىرعىزستاننان اسكەري بازاسىن شىعارۋعا دايىن - پۋتين

استانا. قازاقپارات - رەسەي كەز كەلگەن ۋاقىتتا قىرعىزستان اۋماعىندا ورنالاسقان اسكەري بازاسىن اكەتۋگە دايىن. بۇل تۋرالى ر ف پرەزيدەنتى ۆلاديمير پۋتين بىشكەكتە قىرعىز رەسپۋبليكاسىنىڭ باسشىسى المازبەك اتامبايەۆپەن كەزدەسۋىنەن كەيىنگى باسپا ءسوز ءماسليحاتىندا ءمالىم ەتتى،

دەپ حابارلايدى «كابار».

ونىڭ اتاپ وتۋىنشە، كانت قالاسىنداعى اسكەري بازا 1999-2000 -جىلدارى سول كەزدەگى قىرعىزستان باسشىلىعىنىڭ ءوتىنىشى بويىنشا اۋعانستان اۋماعىنان شەكارا اسىپ كەلىپ، لاڭكەستىك اكتىلەرىن ۇيىمداستىرعان سودىرلاردىڭ ارەكەتىنە توسقاۋىل قويۋ ماقساتىندا قۇرىلعان. «بۇل شارالار حالىقارالىق تەرروريستەرمەن ءتيىمدى كۇرەسۋ ءۇشىن قابىلدانعان ەدى»، - دەپ اتاپ ءوتتى ر ف پرەزيدەنتى.

 پۋتيننىڭ ايتۋىنشا، ەگەر قىرعىزستان الداعى ۋاقىتتا قارۋلى كۇشتەرىن نىعايتاتىن بولسا، رەسەي بىردەن اسكەري بازانى شىعارادى. سونداي- اق ول رەسەي بازاسى قىرعىزستاندا قاۋىپسىزدىكتى قامتاماسىز ەتۋ ءۇشىن عانا قاجەت ەكەنىنە توقتالدى. ال قىرعىز رەسپۋبليكاسىنىڭ پرەزيدەنتى المازبەك اتامبايەۆتىڭ ايتۋىنشا، بۇگىنگى كەزدەسۋدە رەسپۋبليكا اۋماعىنداعى رەسەيلىك اسكەري بازانى نىعايتۋ ماسەلەسى تالقىلانعان جوق.

 «ەرەكشە اتاپ وتكىم كەلەتىن جايت، رەسەي، كەرىسىنشە، ءبىزدىڭ قارۋلى كۇشتەرىمىزدى نىعايتۋعا نيەتتى»، - دەدى ا. اتامبايەۆ.