10:17, 28 - اقپان 2017 | GMT +5
ەكى تۋريست ايعا ۇشۋعا دايىندالىپ جاتىر
استانا. قازاقپارات - امەريكالىق SpaceX جەكەمەنشىك عارىش كومپانياسى ەكى ادامدى ايعا ۇشىرۋدى جوسپارلاپ وتىرعانىن حابارلادى.
كومپانيا باسشىسى يلون ماسكتىڭ ايتۋىنشا، بۇل جولى ايعا كاسىبي استروناۆتار ەمەس، اقشاسى مەن ۇشۋعا دەگەن نيەتى بار ەكى ادام تۋريست رەتىندە ساپار شەگەدى، دەپ حابارلايدى Baq.kz.
SpaceX باسشىسى عارىشقا اتتاناتىن بولاشاق ەكى ءتۋريستىڭ اتىن اتاۋدان باس تارتتى. تەك ولاردىڭ گولليۆۋدتان ەمەس ەكەنىن، قوس جولاۋشىنىڭ ءبىر- بىرىمەن تانىس ەكەنىن ايتتى. ولار بيىل قاجەتتى مەديتسينالىق تەكسەرىستەن ءوتىپ، كەيىن ۇشۋعا دايىندىق باستالادى.
«بۇل باعدارلاما - ادامزات ءۇشىن سوڭعى 45 جىل ىشىندە العاش رەت قيان عارىشقا قايتا ورالۋ مۇمكىندىگى» ، - دەپ سانايدى يلون ماسك.
الىس ساپارعا شىعاتىن عارىش كەمەسى سىناقتان ءوتىپ جاتىر جانە وسى جىلى عارىشكەرلەرسىز العاشقى ساپارعا اتتانادى دەپ جوسپارلانۋدا. ال تۋريستەر ايعا 2018 -جىلى ۇشادى دەپ بولجانىپ وتىر.
