قازاقستان مەن قىرعىزستان تالاس وزەنىنىڭ سۋىن بولىسۋگە ۋاعدالاستى

تاراز. قازاقپارات - جامبىل وبلىسىنىڭ دەلەگاتسياسى قىرعىزستان رەسپۋبليكاسىنىڭ تالاس وبلىسى تالاس قالاسىنا ساپارلاپ قايتتى. ەكى شەكارالاس وبلىستاردىڭ باسشىلارى كەزدەسۋ بارىسىندا ساۋدا- ساتتىق، اۋىل شارۋاشىلىعى، تالاس پەن شۋ ترانس شەكارالىق وزەندەرىنىڭ سۋ قورىن ءبولىسۋ جايتتارىن تالقىلاعان بولاتىن،

 دەپ حابارلايدى قازاقپارات ءتىلشىسى جامبىل وبلىسى اكىمىنە سىلتەمە جاساپ.

«بىلتىر 2016 -جىلى جامبىل وبلىسى اكىمدىگى مەن قىرعىز رەسپۋبليكاسى تالاس وبلىسىنىڭ ۇكىمەتى قۇزىرلى وكىلدەرىنىڭ اراسىندا ساۋدا، اۋىل شارۋاشىلىعى، ۆەتەريناريا جانە فيتوسانيتاريا احۋالى، سونىمەن قاتار تالاس وزەنىنىڭ سۋىن ءبولىسۋ بويىنشا ارىپتەستىك تۋرالى مەموراندۋمعا قول قويدى»، - دەدى جامبىل وبلىسىنىڭ اكىمى كارىم كوكىرەكبايەۆ.

وبلىس باسشىسىنىڭ ايتۋىنشا، جامبىل وڭىرىندە جىل سايىن ازىق- تۇلىككە دەگەن سۇرانىس ارتۋدا، سول سەبەپتى اۋىل شارۋاشىلىعىندا ەگىستىك جەرلەردىڭ كولەمى دە ارتۋدا. وسىعان وراي جامبىلدىق باعباندار ىلعال ساقتاعىش تەحنولوگيالاردى بەلسەندى پايدالانۋدا. الايدا سۋارمالى سۋ ماسەلەسىن شەشۋ ءۇشىن بۇل ازدىق ەتىپ وتىر. جامبىل وبلىسى سۋارۋ ماۋسىمى كەزىندە بۇل تىرشىلىك كوزىنىڭ 2,8 - 3 ميلليارد تەكشە مەترىن قاجەت ەتەدى. بۇل سۋدىڭ 80 پايىزى قىرعىزستاننان الىنادى. جامبىل وبلىسىنداعى 173 مىڭ گەكتار جەر قىرعىزستاننان كەلەتىن سۋمەن سۋارىلادى. كەزدەسۋ بارىسىندا شۋ مەن تالاس وزەندەرىنىڭ سۋىن ءبولىسۋ تۋرالى ەرەجەگە سايكەس، مەملەكەتتەر اراسىندا سۋ رەسۋرستارىن ءبولىسۋدىڭ ماڭىزدىلىعى اتاپ ءوتىلدى.

اكىمنىڭ ايتۋىنا قاراعاندا، ءوزارا ۇيلەسىمدى جۇمىستىڭ بولماعانىنان 2016 -جىلى كيروۆ سۋ قويماسىنان سۋ اعىزۋ وقيعالارى ورىن العان. سالدارىنان ءبىرشاما اۋىلداردى سۋ باسىپ كەتتى، ونداعان ميلليون تەڭگە شىعىن كەلدى. وسىعان بايلانىستى وبلىس باسشىسى، 2017 -جىلعا ارنالعان كيروۆ سۋ قويماسىنىڭ بىرلەسە كەلىسىلگەن جۇمىس كەستەسىن جاساۋدى ۇسىندى.

اۆتور: جاسۇلان جولدىبايەۆ