ديماش استاناعا جاسىرىن كەلۋگە تىرىسقان
قىتايدا جانكۇيەرلەرىنەن اياق الىپ جۇرە المايتىن ديماشتى استانادا ءبىر شاعىن توپ فاناتتارى عانا قارسى العانىن جازعانبىز. بۇگىن جۋرناليستەرمەن اڭگىمەلەسكەن ديماشتىڭ رەسمي وكىلى الپامىس ءشارىموۆ بۇنىڭ سەبەبىن ءتۇسىندىرىپ بەردى، دەپ حابارلايدى قازاقپارات.
«استاناعا كەلەتىنىمىزدى ەشكىم بىلگەن جوق. ءبىز مەيلىنشە جاسىرىن كەلۋگە تىرىستىق. ءبىراق، كۇتىپ العان ءاربىر ادامعا العىسىمىز شەكسىز. سەبەبى، ءبىز ءدال سول رەيسپەن كەلەتىنىمىزدى ايتقان جوقپىز، قايدان ءبىلىپ قويعانىن ءوزىمىز دە بىلمەيمىز. كەلەدى دەپ ايتىلعان، ءبىراق، قاي رەيسپەن كەلەتىنى بەلگىسىز ەدى»، - دەيدى ديماشتىڭ رەسمي وكىلى. الپامىس ءشارىموۆ سونداي- اق استاناعا كەلگەندە ديماشتى ەشكىم قارسى المادى دەگەن پىكىرلەرگە تۇسىنىكتەمە بەردى.
ونىڭ ايتۋىنشا، قازاقستان مەن قىتايدا ۇشاقتارعا بيلەت الۋدىڭ ءتارتىبى ەكى ءتۇرلى. ياعني، قىتايدا بەلگىلى ءبىر رەيسكە كىمدەردىڭ بيلەت العانى ينتەرنەتكە ىلىنەدى ەكەن. «ال، قازاقستاندا ولاي ەمەس. سوندىقتان، ەكى جاقتىڭ بيلەت الۋىنىڭ جۇيەسى ەكى ءتۇرلى بولعان سوڭ، ديماشتىڭ استاناعا كەلەتىنىن كوپ ەشكىم بىلگەن جوق»، - دەپ ءتۇسىندىردى الپامىس ءشارىموۆ.
ايتا كەتەيىك، قىتايدا ءوتىپ جاتقان «Singer-2017» ءان شوۋىنىڭ جەتىنشى كەزەڭىنەن كەيىن ديماش قۇدايبەرگەن قازاقستانعا كەلگەن بولاتىن.
اۆتور: كەنجەكەي توقتامۇرات قىزى
