جاپونيا قازاقستانعا قارجىلاي كومەك كولەمىن قىسقارتادى - ەلشى كاۆاباتا
بۇل تۋرالى بۇگىن جاپونيانىڭ قازاقستانداعى توتەنشە جانە وكىلەتتى ەلشىسى يتيرو كاۆاباتا ءمالىم ەتتى، دەپ حابارلايدى قازاقپارات.
«1993 -جىلدان بەرى ءبىز نەسيە، گرانت جانە تەحنيكالىق كومەك تۇرىندە جاردەم بەرىپ كەلەمىز. 2016 -جىلدىڭ سوڭىندا جاپونيانىڭ قازاقستانعا رەسمي كومەگىنىڭ جالپى كولەمى 1 ميلليارد 150 ميلليون دوللاردان استى. ونىڭ ىشىندە «ءشوپ تامىرى» جوباسى اياسىندا كورسەتىلگەن 5 ميلليون 769 مىڭ دوللار دا بار»، دەدى ول قازاقستانىڭ الەۋمەتتىك جوبالارىنا ارنالعان گرانتتىق كەلىسىمشارتقا قول قويۋ بارىسىندا.
سونىمەن قاتار ەلشى جاپونيانىڭ الداعى ۋاقىتتا دا قازاقستانعا كومەك كورسەتە بەرەتىندىگىن باسا ايتتى.
«ارينە، ءبىز «ءشوپ تامىرى» جوباسى اياسىندا كومەك كورسەتۋىمىزدى جالعاستىرا بەرەمىز. دەگەنمەن، قازاقستاننىڭ مارتەبەسى جىلدان جىلعا جاقسارىپ كەلەدى. ەگەر بۇرىن قازاقستان رەتسيپيەنت بولسا، قازىر دونورعا اينالدى. سىزدەر وزدەرىڭىز قازىر باسقا ەلدەرگە كومەكتەسەسىزدەر. سوندىقتان ءبىزدىڭ قازاقستانعا قاتىستى كومەگىمىزدىڭ اياسى شەكتەلە تۇسەدى. قازىر بىزدە «ءشوپ تامىرى» باعدارلاماسى عانا قالىپ وتىر»، - دەدى كاۆاباتا.
ايتا كەتەيىك، بۇگىن قازاقستاننىڭ 6 ءبىلىم جانە مەديتسينا مەكەمەسى جاپونيا ۇكىمەتىنىڭ «ءشوپ تامىرى» باعدارلاماسى اياسىندا 261942 مىڭ دوللار كولەمىندە قايتارىمسىز كومەك الۋعا گرانتتىق كەلىسىمشارتقا وتىرعان بولاتىن.
اۆتور: مارلان جيەمباي
