18:28, 27 - اقپان 2017 | GMT +5
قىتايلىق قازاق ازيانىڭ ۇزدىك بوكسشىسى دارەجەسىن قورعاپ قالدى
بەيجىڭ- كۇنميڭ. قازاقپارات - 26 - اقپان كۇنى كەشكە ق ح ر يۋننان پروۆينتسياسى كۇنميڭ قالاسىندا كاسىبي بوكستان جەڭىل سالماقتاعى (53,5 كەلىگە دەيىن) قىتاي چەمپيونى 23 جاستاعى ەلشات نىعماتوللا ۇلى WBO تۇجىرىمى بويىنشا ازيا چەمپيونى بەلبەۋىن قورعاپ قالدى، دەپ حابارلادى وسى ەلدەگى «قازاقپارات» ح ا ا مەنشىكتى ءتىلشىسى.
بوكسشى 37 جاستاعى فيليپپيندىق دجايار ەسترەمەستى 6 راۋندتا جيناعان ۇپاي سانىمەن ۇتتى. بۇل ونىڭ كاسىبي رينگتەگى 10- جەكپە- جەگى. ول بارلىعىندا جەڭىسكە جەتسە، ونىڭ ەكەۋىن نوكاۋتپەن اياقتادى.
«بۇل ايقاستا مەن چەمپيوندىق بەلدىگىمدى قورعاپ قالدىم. ەندى وسى جىلى ءساۋىردىڭ سوڭىندا اومەنگە، سوسىن اقش- قا بارۋدى جوسپارلاۋدامىن»، - دەدى ول قازاقپاراتقا بەرگەن سۇحباتىندا.
ەسكە سالساق، قىتايدا كاسىبي رينگ چەمپيوندارىنىڭ كوپشىلىگىنىڭ وتانى ق ح ر شىنجاڭ- ۇيعىر اۆتونوميالىق اۋدانى التاي وكرۋگىنىڭ قابا قالاسى بولىپ تابىلادى. ول جەردە بوكسشىلاردى مۇرات بوشاي ۇلى جاتتىقتىرادى. ول ەلشات نىعماتوللا ۇلى، بەيسەن ناسيوللا ۇلىنىڭ عانا ەمەس، سونىمەن بىرگە قانات يسلامنىڭ دا جولىن اشقان.
