ديماش ءوزى وقىپ جاتقان «قارا شاڭىراعىنا» كەلدى – فوتو

 استانا. قازاقپارات - بۇگىن ءانشى، قىتايدا ءوتىپ جاتقان ءان بايقاۋىندا باعى جانىپ، ورتا ازيا ەلدەرىندە كەڭ تانىلعان ديماش قۇدايبەرگەن استاناداعى قازاق ۇلتتىق ونەر اكادەمياسىنا كەلدى.

ۇستازدارى مەن دوستارى ديماشتى ۇلكەن قوشامەتپەن قارسى الدى، دەپ حابارلايدى قازاقپارات.

 «قۇرمەتتى ۇستازدار جانە دوستار، زامانداستار!. شىن جۇرەكتەن بارىڭىزگە العىس بىلدىرەمىن. قاتتى تەبىرەنىپ تۇرمىن، سوندىقتان، دۇرىس راقمەت ايتا الماسام، ايىپ ەتپەڭىزدەر. بۇگىن قارا شاڭىراعىما كەلدىم. قازىر ءوزىمىزدى الەمگە تانىستىراتىنداي مۇمكىندىگىمىز بار جانە سول مۇمكىندىگىمىزدى پايدالانا ءبىلۋ كەرەك» ، - دەگەن ديماش مەملەكەت باسشىسى نۇرسۇلتان نازاربايەۆ پەن ونەر اكادەمياسىنىڭ رەكتورى ايمان مۇساقوجايەۆاعا العىسىن ايتتى.

ايتا كەتەيىك، قىتايداعى «I am a singer» شوۋىنا قاتىسىپ جاتقان ديماش قۇدايبەرگەننىڭ قازىر تانىمالدىعى قاتتى ارتىپ، كەشە عانا شوۋدىڭ التىنشى كەزەڭىنەن كەيىن اتاقتى فرانسۋز ءانشىسى لارا فابياننىڭ ءوزى ديماشتى جەتىنشى كەزەڭدەگى جەڭىسىمەن قۇتتىقتادى. ونىڭ الدىندا اتاقتى اكتەر جەكي چان ديماشپەن كەزدەسىپ، ونىڭ ءانى مەن كۇيىن تىڭداعان ەدى.