ەندى «الماتى- بەيجىڭ» جانە «استانا- بەيجىڭ» اۋە رەيستەرىنىڭ جيىلىگى ارتادى

استانا. قازاقپارات - «الماتى- بەيجىڭ» جانە «استانا- بەيجىڭ» اۋە رەيستەرىنىڭ جيىلىگى ارتادى.

بۇل تۋرالى ق ر ينۆەستيتسيالار جانە دامۋ ءمينيسترى جەڭىس قاسىمبەك ءوزىنىڭ فەيسبۋكتەگى پاراقشاسىندا جازدى، دەپ حابارلايدى قازاقپارات. «قىتايعا جاساعان جۇمىس ساپارىمدا ق ح ر كولىك ءمينيسترى لي شياوپەنمەن كەزدەسىپ، ناتيجەلى ديالوگ قۇردىق. بۇگىنگى تاڭدا ەكى ەل اراسىنداعى ىنتىماقتاستىق جان- جاقتى ستراتەگيالىق ارىپتەستىككە اينالدى. بيىل يندۋستريا، كولىك سالالارى بويىنشا بىرلەسكەن جاڭا كاسىپورىنداردى ىسكە قوسۋ جوسپارلانىپ وتىر جانە ەكونوميكانىڭ ءتۇرلى سالالارىن قامتيتىن جاڭا جوبالاردىڭ قۇرىلىسى باستالادى. ءبىز ترانزيتتىك- كولىك سالاسىنداعى ەۋرازيالىق الەۋەتتى مەيلىنشە جۇزەگە اسىرۋعا مۇددەلىمىز. ساراپشىلاردىڭ باعالاۋىنشا، 2020 -جىلعا قاراي ايماقتاعى ساۋدا كولەمى 1,2 تريلليون دوللارعا جەتەدى. ال، قىتاي مەن ەۋروپالىق وداق اراسىنداعى تاۋار اينالىم 800 ميلليارد دوللاردى قۇرايتىن بولادى، جۇك تاسىمالىنىڭ كولەمى 170 ميلليون تونناعا دەيىن ارتادى»، - دەپ اتاپ وتەدى قاسىمبەك.

سونىمەن قاتار ول قازاقستان ءۇشىن قىتايدان ورتالىق ازيا ەلدەرىنە، رەسەي، ەۋروپا، سونىمەن قاتار، يران مەن تاياۋ شىعىس ەلدەرىنە كونتەينەرلىك تاسىمالدى ارتتىرۋ وزەكتى ماسەلە بولىپ تۇرعانىن باسا اتاپ وتكەن. «قىتاي- قازاقستان- ەۋروپا باعىتى بويىنشا كونتەينەرلىك جۇك تاسىمالداۋ ۇتىمدى جول. قىتاي- ەۋروپا باعىتى بويىنشا 2016 -جىلى قاڭتار- قاراشا ايلارى ارالىعىندا 725 پويىزبەن 62816 كونتەينەر تاسىمالداندى. ال، ەۋروپا- قىتاي باعىتى بويىنشا 30187 كونتەينەر تاسىمالدانعان. پويىزداردىڭ ورتاشا جىلدامدىعى تاۋلىگىنە 950 شاقىرىمدى قۇرايدى. سونداي-اق، ءبىز كورشى ەلمەن اۆياتسيا سالاسىنداعى ىنتىماقتاستىقتى نىعايتۋدى جوسپارلاپ وتىرمىز. بيىل «الماتى- بەيجىڭ» اۋە رەيسى اپتاسىنا 5 تەن 7 گە دەيىن، ال، استانادان بەيجىڭگە اپتاسىنا 2 دەن 4 كە دەيىن ارتاتىن بولادى. استانا- ءۇرىمجى جانە الماتى- ءۇرىمجى باعىتتارىنا قوسىمشا رەيستەر شىعاتىن بولادى»، - دەدى مينيستر.

اۆتور: مارلان جيەمباي