ديماش ۇستازى مارات ايتىموۆكە سالەم بەرە باردى
عازيزا جۇبانوۆا اتىنداعى فيلارمونيادا وتكەن كەزدەسۋدەن سوڭ ۇستاز بەن شاكىرت ءبىر-بىرىنە العىسىن الەۋمەتتىك جەلىدەگى پاراقشالارى ارقىلى جەتكىزدى، دەپ حابارلايدى قازاقپارات ءتىلشىسى.
قىتايدا ءوتىپ جاتقان ءان بايقاۋىنىڭ كەلەسى كەزەڭىنە دەيىن ءبىر اپتالىق دەمالىس العان ديماش قۇدايبەرگەن سەنبى كۇنى اقتوبەگە كەلدى. ول جەكسەنبىدە قىتايلىق ارنانىڭ ءتۇسىرۋ توبىمەن ۇستازى مارات ايتىموۆكە سالەم بەردى. قازاق ەلىن الەمگە تانىتىپ جۇرگەن ديماشتى قارسى العان ۇستازى ءوز پاراقشاسىنا: «ديماش، بالام، قىتاي جۋرناليستەرىمەن كەلىپ سالەم بەرىپ كەتتى. دەنىڭ ساۋ بولسىن! امان ءجۇر! ساتتىلىك تىلەيمىن!»، - دەپ جازعان.
ۇستاز بەن شاكىرت اراسىنداعى ىستىق لەبىزگە وقىرماندار دا ءوز ىقىلاسىن ءبىلدىردى، ءسۇيسىندى. ال ديماش قۇدايبەرگەن «سىزگە ەشكىم جەتپەيدى» دەپ پىكىر قالدىردى. «وسىنىڭ ءبارى ءسىزدىڭ ارقاڭىز، اعاي... مەن بىلەتىن مارات اعاي ماقتاعاندى ۇناتپايدى. ءبىراق رەنجىمەڭىز، ءسىزدى ماقتاماۋدىڭ ءوزى ايىپ. سىزگە كوپ-كوپ راحمەت! بۇگىن ءسىزدى كورىپ، ماۋقىمدى باسىپ الىپ، ەرەكشە كۇيگە بولەندىم. سىزدەن قانشا ەسكەرتۋ الساق تا، ءدارىس الساق تا ءبىز ءۇشىن باقىت. قانشا شەتەلدىك مۇعالىمدەردەن ساباق السام دا، وسكەنىمىزدى شىن جۇرەكتەن قالايتىن سىزگە ەشكىم جەتپەيدى ەكەن»، - دەپ جازدى ديماش. ۇستازى بۇل سوزدەن سوڭ شاكىرتىنەن كاسىبي ىزدەنىسىن توقتاتپاۋىن سۇرادى.
«جانىم، ديماش، بالام. كورگەندى، تاربيەلى جەردەن شىققانىڭدى ۇمىتپا ەشقاشان. پەندەشىلىككە سالىنبا. كاسىبي ىزدەنۋدەن شارشاما. امان ءجۇر. ساتتىلىك تىلەيمىن. جولىڭدا تەك جاقسى ادامدار جولىعۋىنا تىلەكتەسپىن»، - دەدى ءوز سوزىندە ۇستازى مارات ءايتىموۆ.
اۆتور: التىناي ساعىندىقوۆا
