نۇرسۇلتان نازاربايەۆ پەن كارىپبەك كۇيىكوۆ بەيبىتشىلىك سالاسىنداعى نوبەل سىيلىعىنا ۇسىنىلدى

استانا. قازاقپارات - بازەل بەيبىتشىلىك كەڭەسى بەيبىتشىلىك عىلىمي- زەرتتەۋ ينستيتۋتىنىڭ ديرەكتورى الين ۆارە قازاقستان پرەزيدەنتى نۇرسۇلتان نازاربايەۆ پەن «اتوم» جوباسىنىڭ قۇرمەتتى ەلشىسى، سۋرەتشى كارىپبەك كۇيىكوۆتى نوبەل سىيلىعىنا ۇسىندى، دەپ حابارلايدى قازاقپارات.

بۇل جايىندا انتيادرولىق قوزعالىس بەلسەندىسى ءوزىنىڭ فەيسبۋكتەگى پاراقشاسىندا جازدى. «اعىمداعى جىلى مەن كارىپبەك كۇيىكوۆ پەن پرەزيدەنت نۇرسۇلتان نازاربايەۆتى يادرولىق قارۋدى جويۋداعى ەرەن كۇش-جىگەرلەرى ءۇشىن بەيبىتشىلىك سالاسىنداعى نوبەل سىيلىعىنا ۇسىندىم»، - دەپ جازدى ول.

الين ۆارە كورسەتكەن سىلتەمەدەگى سىيلىققا ۇمىتكەرلەر شورت- پاراعىندا نازاربايەۆ پەن كۇيىكوۆتى ۇسىنۋ بريتاندىق ساياساتكەر بيلل كيددتەن تۇسكەن. وتىنىمدە مەملەكەت باسشىسى نۇرسۇلتان نازاربايەۆتىڭ قازاقستان كوشباسشىسى رەتىندە 22 جىل بويى يادرولىق قارۋسىزدانۋ سالاسىندا ءبىرقاتار ماڭىزدى باستامالار قابىلداعاندىعى ايتىلعان.

پرەزيدەنت يادرولىق قارۋدان ازات الەمگە قول جەتكىزۋ پروتسەسىنە ىقپال ەتەتىن ءبىرقاتار باستامانى قابىلداۋدى جالعاستىرىپ كەلەدى. ال كارىپبەك كۇيىكوۆ جەتەكشىلىك ەتەتىن «اتوم» جوباسى الەمدى يادرولىق قارۋدان ازات ەتۋگە باعىتتالعان. الين ۆارە «پارلامەنتشىلەر يادرولىق قارۋدى تاراتپاۋ جانە قارۋسىزدانۋ ءۇشىن» حالىقارالىق فورۋمىنىڭ جاھاندىق ۇيلەستىرۋشىسى. ءوتىنىمنىڭ اعىلشىن تىلىندەگى تۇپنۇسقاسىمەن مىنا جەردەن تانىسۋعا بولادى.

اۆتور: مارلان جيەمباي