قىرعىزستاندا پارلامەنتتەگى وپپوزيتسيانىڭ باسشىسى ۇستالدى

استانا. قازاقپارات - بىشكەكتىڭ «ماناس» اۋەجايىندا قىرعىز ارنايى قىزمەتتەرى قىرعىزستان پارلامەنتىنىڭ «اتا مەكەن» وپپوزيتسيالىق فراكسياسىنىڭ كوشباسشىسى ومۋربەك تەكەبايەۆتى ۇستادى، دەپ حابارلايدى بي- بي- سي اگەنتتىگى.

قىرعىز ەلىنىڭ ۇلتتىق قاۋىپسىزدىك مەملەكەتتىك كوميتەتىنىڭ باسپا ءسوز قىزمەتى حابارلاعانداي، تەكەبايەۆ 48 ساعاتقا ۇستالعان جانە قازىر ۋاقىتشا ۇستاۋ اباقتىسىندا وتىر. ومۋربەك تەكەبايەۆتىڭ جاقتاستارى جەكسەنبى كۇنى ۇ ق م ك عيماراتى الدىندا ساياساتكەردى بوساتۋدى تالاپ ەتىپ، ەرەۋىلگە شىعۋعا نيەتتى.

قىرعىزستاندىق ب ا ق- تىڭ حابارلاۋىنشا، اۋەجاي عيماراتىندا تەكەبايەۆتىڭ پارتيالاستارى ونى ۇستاۋعا قارسىلىق تانىتتى جانە بىرنەشەۋى ۇستالدى. 25 -اقپان كۇنى قىرعىزستان باس پروكۋراتۋراسى تەكەبايەۆقا قاتىستى «سىبايلاس جەمقورلىق» جانە «الاياقتىق» باپتارى بويىنشا قىلمىستىق ءىس قوزعادى. ءىس رەسەيلىك كاسىپكەر، ءبىرقاتار تەلەكوممۋنيكاتسيالىق كومپانيالاردىڭ يەسى دەونيد مايەۆسكيدىڭ شاعىمى بويىنشا قوزعالدى. ول 2010 -جىلى تەكەبايەۆتىڭ ۋاقىتشا قىرعىزستان ۇكىمەتى ءتوراعاسىنىڭ ورىنباسارى بولا تۇرا، قىرعىزستاننىڭ ءىرى ۇيالى وپەراتورى «مەگاكومدى» باسقارۋعا رۇقسات بەرۋ ءۇشىن ءبىر ميلليون دوللار پارا العانىن ايتۋدا. «ءوز مىندەتتەرىن تەكەبايەۆ سول كۇيى ورىندامادى ال العان قاراجاتتى قايتارۋدان باس تارتقان»، - دەپ مالىمدەدى قىرعىزستان باس پروكۋراتۋراسىنىڭ باسپا ءسوز قىزمەتى. تەكەبايەۆ وزىنە قاتىستى قىلمىستىق ءىس قوزعالعاندا ۆەنادا ە ق ى ۇ پارلامەنتتىك اسسامبلەياسىنىڭ سەسسياسىندا بولدى، ول جەرگىلىكتى ب ا ق- قا بەرگەن سۇحباتىندا رەسەيلىك كاسىپكەردەن ءبىر ميلليون دوللار پارا الدى دەگەن ايىپتاۋدى جوققا شىعاردى.