كاسىپكەرلەردىڭ جەكەشەلەندىرۋگە قاتىستى ارىزى بار

«مەملەكەتتىك ساتىپ الۋلار سالاسىندا، اسىرەسە، كۆازيمەملەكەتتىك سەكتورداعى ساتىپ الۋلارعا قاتىستى كوپ ارىز تۇسەدى. سونداي-اق، جەكەشەلەندىرۋ ماسەلەسى دە وزەكتى قالپىندا. مەملەكەت باسشىسى ءوز جولداۋىندا مەملەكەتتىڭ جالپى ىشكى ونىمىندەگى ۇلەسىن 15 پايىزعا دەيىن ازايتۋ كەرەك دەگەن بولاتىن. ءبىراق، پالاتامىزعا كاسىپكەرلەردەن جەكەشەلەندىرۋگە قاتىستى ارىزدار ءتۇسىپ جاتىر»، - دەدى كەڭەس وتىرىسىندا ءماجىلىس دەپۋتاتى كەڭەس ءابساتىروۆ.

دەپۋتاتتىڭ ايتۋىنشا، جەكەشەلەندىرۋدىڭ نەگىزگى ماقساتى - بيزنەستەگى مەملەكەتتىڭ ۇلەسىن ازايتۋ. «ال بىزدە قالاي؟ الدىمەن بەلگىلى ءبىر كاسىپورىن جەكەشەلەندىرۋگە شىعارىلادى. كاسىپكەر ول كاسىپورىننىڭ 51 پايىزىن ساتىپ الادى، قالعان 49 پايىزىن كۆازيمەملەكەتتىك سەكتوردا قالادى. سوسىن، كۆازيمەملەكەتتىك سەكتور بيزنەستى «تۇنشىقتىرا» باستايدى»، - دەيدى دەپۋتات.

جالپى، كەڭەسكە قاتىسقان تاراپتار كۆازيمەملەكەتتىك سەكتوردىڭ بيزنەسكە ارالاسۋىن ازايتىپ، جەكەشەلەندىرۋ پروتسەسىندەگى كۆازيمەملەكەتتىك سەكتوردىڭ ارالاسپاۋىن باقىلايمىز دەگەن پايىمعا كەلدى.

اۆتور: كەنجەكەي توقتامۇرات قىزى