16:42, 25 - اقپان 2017 | GMT +5
بىرىككەن ۇلتتار ۇيىمى قارىزى بار التى مەملەكەتتى داۋىس بەرۋ قۇقىعىنان ايىردى
استانا. قازاقپارات - ب ۇ ۇ باس اسسامبلەياسى مۇشەلىك جارنانى تولەمەگەن التى ەلدى داۋىس بەرۋ قۇقىعىنان ۋاقىتشا ايىردى. بەرەشەگى ەڭ كوپ ەل - ۆەنەسۋەلا. بۇل تۋرالى ب ۇ ۇ- نىڭ بەيسەنبى، 24 - اقپان كۇنى جاريالانعان حابارلاماسىندا ايتىلادى.
قارىزى ەڭ كوپ ەل بولىپ سانالاتىن ۆەنەسۋەلا تەك $24 ميلليون قارجىنى تولەگەن سوڭ داۋىس بەرۋگە قاتىسا الادى. قالعان بەس ەل - كابو ۆەردە، ليۆيا، پاپۋا- جاڭا گۆينەيا، سۋدان مەن ۆانۋاتۋ ب ۇ ۇ باس اسسامبلەياسىنىڭ 71-سەسسياسىنىڭ جۇمىسى اياقتالعانعا دەيىن، ياعني 2017 -جىلدىڭ كۇز مەزگىلىنە دەيىن داۋىس بەرۋ قۇقىعىنان شەتتەتىلدى.
بورىشكەر- ەلدەر ەكى جىلدىق سومانى تولەگەننەن كەيىن عانا داۋىس بەرۋ قۇقىعىن قايتارا الادى. بۇل تۋرالى ب ۇ ۇ- نىڭ جاڭا باس حاتشىسى انتونيۋ گۋتەرريش قاڭتار ايىنىڭ سوڭىندا مالىمدەدى. جىل سايىنعى جارنا سوماسى ءار ەلگە جەكە ەسەپتەلەدى.
