ونەر جۇلدىزدارى ءبىر كۇن ۇلتتىق مۋزەيدە ەكسكۋرسيا جۇرگىزەدى

استانا. قازاقپارات - 28 - اقپاندا ساعات 14:00-دە قازاقستان رەسپۋبليكاسى ۇلتتىق مۋزەيىندە قازاقستاندىق تانىمال ونەر جۇلدىزدارىنىڭ قاتىسۋىمەن «جۇلدىزدى گيد» جوباسى وتەدى، دەپ حابارلايدى مۋزەيدىڭ باسپا ءسوز قىزمەتى.

شارادا وتاندىق ونەر جۇلدىزدارى ۇلتتىق مۋزەيگە كەلۋشىلەرگە ارنايى ەكسكۋرسيا جۇرگىزەدى. مۋزەي قوناقتارى انشىلەر مەن اكتەرلەردى ەكسكۋرسيا جۇرگىزۋشىسى رەتىندە تانىپ، وزدەرىنە قاجەتتى اقپاراتتار الا الادى.

 «جۇلدىزدى گيد» جوباسى بارىسىندا مۋزەيدىڭ التىن زالىن - ءانشى التىناي جورابايەۆا، تاريح زالىن - اكتەر ءادىل احمەتوۆ، تاۋەلسىز قازاقستان زالىن - ءانشى ينديرا راسىلحان، ەتنوگرافيا زالىن - اكتەر قۋاندىق قىستىقباي، استانا زالىن - ءانشى شاحاريزات سەيداحمەت تانىستىرادى. شارا سوڭىندا كەلۋشىلەردىڭ نازارىنا جۇلدىزداردىڭ قاتىسۋىمەن وتەتىن كونسەرت ۇسىنىلادى.

 جوبانىڭ ماقساتى - ۇلتتىق مۋزەيدىڭ قوناقتارىنا قىزىقتى ەكسكۋرسيا ۇسىنا وتىرىپ، تاريحى تەرەڭ مۇرالارىمىز بەن قۇندى جادىگەرلەرىمىزدى ناسيحاتتاۋ.