10:27, 25 - اقپان 2017 | GMT +5
ناماز ۇستىندە توبەلەس شىعارعان ايەلدەر جۇرتتى شوشىتتى - كەسكىن
استانا. قازاقپارات - Youtube الەۋمەتتىك جەلىسىندە مەشىت ىشىندە ەر ازاماتتار ناماز وقىپ جاتقان ساتتە قاستارىنان ءوتىپ بارا جاتقان ايەلدەردىڭ ءبىر- بىرىمەن جۇلىسىپ، توبەلەس شىعارعان ءساتى بەينەلەنگەن ۆيدەو ەلدىڭ جاعاسىن ۇستاتتى.
العاشىندا ەر ازاماتتار نامازدارى بۇزىلماس ءۇشىن ولارعا ءمان بەرمەي، قۇلشىلىقتارىن ودان ءارى جالعاستىرىپ جاتقان بولاتىن. الايدا، ايەلدەر شۋ شىعارىپ، اقىرى توبەلەسكە ۇلاسقان كەزدە كەيبىر ازاماتتاردىڭ ولاردى اجىراتۋ ءۇشىن قۇلشىلىقتارىن توقتاتۋىنا تۋرا كەلدى. ايەلدەردى اجىراتىپ جۇرگەن ەر كىسىلەردىڭ كەيبىرىنىڭ ولارعا شاماسى جەتپەي قالعان ساتتەرىن ۆيدەودان انىق كورۋگە بولادى.
ازىرشە، اللا ۇيىندەگى مۇنداي سوراقىلىقتىڭ قايدا جانە قاشان ورىن العانى بەلگىسىز. تەك، ۆيدەوداعى ادامداردىڭ كيىم ۇلگىلەرىنە قاراپ، وقيعانىڭ اراب ەلدەرىندە ورىن الۋى مۇمكىن دەپ توپشىلاۋعا بولادى. ونىڭ ۇستىنە، جاريالانعان ۆيدەونىڭ ساپاسىنا قاراپ مۇنىڭ ءبىراز ۋاقىت بۇرىن بولعان وقيعا ەكەندىگىن اڭعارۋ قيىن ەمەس.
ايدار جاناي
