اۋەسقوي بوكستا جۇرە بەرسەم، وعان ىنتام جوعالاتىنداي سەزىم بولدى - دانيار ەلەۋسىنوۆ

استانا. قازاقپارات - اۋەسقوي بوكستا جۇرە بەرسەم، وعان ىنتام جوعالاتىنداي سەزىم بولدى. بۇل تۋرالى بۇگىن ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرىمەن كەزدەسكەن وليمپيادا چەمپيونى دانيار ەلەۋسىنوۆ ايتتى،

  دەپ حابارلايدى قازاقپارات.

 «كاسىپقوي بوكسقا اۋىسۋ تۋرالى شەشىمگە وليمپيادا ويىندارىنان كەيىن 1-2 پروموۋتەرلىك كومپانيا ۇسىنىس جاساعان سوڭ كەلدىم. سەبەبى، اۋەسقوي بوكستا الماعان اسۋ، باعىندىرماعان بەلەس قالمادى. ادامنىڭ ءوز الدىنا قويعان ماقساتى، ارمانى بولادى. سوعان جەتۋ ءۇشىن كاسىپقوي بوكسقا اۋىسۋ تۋرالى شەشىم قابىلدادىم»، - دەدى دانيار ەلەۋسىنوۆ.

سونىمەن قاتار ول اۋەسقوي بوكستا جۇرە بەرسە، بۇل سپورتقا دەگەن ىنتاسىن جوعالتىپ الاتىنداي سەزىمدە بولعاندىعىن دا ايتتى.

 «كاسىپقوي بوكسقا اۋىسسام، ءبىر جاعىنان اعاما دا دەمەۋ بولامىن دەپ ويلادىم. ويتكەنى، مەن كەلىسىمشارتقا وتىرعان پروموۋتەر تۋعان اعاما دا جاقسى ۇسىنىس جاسادى. ياعني، ەكەۋىمىز بىرگە جاتتىعامىز، اكەمىز دە جانىمىزدا بولادى. دۇرىس قادام جاسادىم دەپ ويلايمىن. الداعى ۋاقىتتا مەنى كاسىپقوي رينگتەن كورەسىزدەر»، - دەدى وليمپيادا چەمپيونى.

ايتا كەتەيىك، ريوداعى 2016 -جىلعى وليمپيادا ويىندارىنىڭ جەڭىمپازى، تانىمال قازاقستاندىق بوكسشى دانيار ەلەۋسىنوۆ (69 ك گ) جاقىندا قۇرىلعان «MJA Entertainment's» پروموۋتەرلىك كومپانياسىمەن كەلىسىمشارت جاساسقان. دانياردىڭ اعاسى داۋرەن ەلەۋسىنوۆ بۇگىنگى كۇنگە دەيىن كاسىپقوي رينگتە بىرنەشە كەزدەسۋ وتكىزىپ، جەڭىسكە جەتكەن بولاتىن.

اۆتور: مارلان جيەمباي