جىل سوڭىنا دەيىن ۇيالى بايلانىس پەن موبيلدى ينتەرنەتتىڭ ساپاسى ارتادى - مينيستر ابايەۆ

استانا. قازاقپارات - جىل سوڭىنا دەيىن قازاقستاندا ۇيالى بايلانىس ساپاسى مەن موبيلدى ينتەرنەتتىڭ ساپاسى ارتادى.

بۇل تۋرالى بۇگىن ۇكىمەتتە وتكەن باسپا ءسوز ءماسليحاتى بارىسىندا اقپارات جانە كوممۋنيكاتسيالار ءمينيسترى داۋرەن ابايەۆ ءمالىم ەتتى، دەپ حابارلايدى قازاقپارات.

«ەلىمىزدە ينتەرنەت جاقسى دامىعان، اسىرەسە، قالالاردا. ءبىراق، ينتەرنەت ۇنەمى جەتىلىپ تۇرادى. جەكەلەگەن ماسەلەلەر تۋىنداپ تۇرادى، ءبىز ول ماسەلەلەردى شەشۋدى مىقتاپ قولعا الامىز. ياعني، قازىر ءبىز بۇكىل قازاقستان بويىنشا راديوجيىلىك ستانسالارىن سالىپ جاتىرمىز. وسى ارقىلى ساندىق تەلەراديوتاراتۋعا كوشەمىز دە بوساعان جيىلىكتەردى ۇيالى وپەراتورعا بەرەمىز. ۇيالى بايلانىس وپەراتورلارى وسى جيىلىكتەردىڭ ارقاسىندا ۇيالى بايلانىس پەن ينتەرنەتتىڭ ساپاسىن ارتتىرادى. راديوجيىلىك ستانسالارىن سالۋعا بەلگىلى ءبىر ۋاقىت كەرەك. جىل سوڭىنا دەيىن، شامامەن 200 راديوجيىلىك ستانساسىن ورناتامىز، سول كەزدە ۇيالى بايلانىس پەن ءموبيلدى ينتەرنەتتىڭ ساپاسى الدەقايدا ارتقانىن بايقايسىزدار»، - دەدى مينيستر.

داۋرەن ابايەۆ سونداي-اق «قازاقتەلەكوم» ا ق ۇسىناتىن قىزمەت ساپاسىنا قاتىستى ايتىلىپ جاتقان سىن-پىكىرلەردى دە نازاردان تىس قالدىرمايتىنىن ايتتى.