سارا توقتامىسوۆا: ايتىس الەمىندە ءجۇرىپ سپورت سالاسىنا اۋىسىپ كەتكەن جوقپىن
بۇل تۋرالى «تاڭشولپان» باعدارلاماسىندا ايتىلدى.
- سارا حانىم، جاڭالىقتارىڭىز كوپ شىعار؟ سولاردى بولىسە وتىرساڭىز...
- الەۋمەتتىك جەلىدەگىلەر ءار ونەر ادامىنىڭ نەمەن اينالىسىپ جۇرگەنىن ءبىلىپ وتىرادى. قازىر ءوزىمنىڭ تۋىندىلارىمدى ءانشى رەتىندە ورىنداپ ءجۇرمىن. وسىدان 2-3 اي بۇرىن «اقەركەم» اتتى تۋىندى شىعارعان بولاتىنمىن. ونىڭ تاريحى تۋرالى ايتىپ تا، جازىپ تا جاتىرمىن. ال بۇگىن ستۋديادا «اكەشىم، اناشىم» دەپ اتالاتىن بارشا قازاقستاندىققا ارنالعان تۋىندىمنىڭ تۇساۋىن كەسكەلى وتىرمىن.
- اتالعان انگە بولاشاقتا بەينەبايان ءتۇسىرۋ ويدا بار ما؟
- قازىر جەلىدە كوپشىلىگى «ءسىز سوندا انشىلىككە بەت بۇردىڭىز با؟» دەگەندەي جازىپ جاتادى. مۇنداي ماقسات مەندە جوق. حالىق، ەڭ ءبىرىنشى، مەنى ايتىس اقىن قىز رەتىندە تانيدى. وسى مەن ءۇشىن ءبىرىنشى ورىندا تۇرادى. مەن ايتىس الەمىندە ءجۇرىپ سپورت سالاسىنا كەتكەن جوقپىن عوي. ايتىسقا قارا دومبىرامىزبەن، ەشكىمنىڭ سۇيەمەلدەۋىنسىز-اق شىعىپ ءجۇرمىز. ادام بالاسىنىڭ جانىنا نە جاقىن بولسا، سونىمەن اينالىسادى عوي.
- ءبىراز بولدى ايتىستىڭ تورىنەن كورىنبەي كەتتىڭىز. بالكىم، وتباسىلىق جاعدايلارمەن جۇرگەن شىعارسىز. الداعى ۋاقىتتا ءسىزدى ايتىستان قاشان كورەمىز؟
- ءيا، ايتىسقا شاقىرۋلار كەلىپ جاتىر. ايتىستان تىسقارى قالىپ جاتقان جوقپىن. قاتىسىپ جۇرگەن ايتىستارىمىزدى ەفيردەن كورسەتپەي جاتىر. مىسالى، قىزىلوردا وبلىسىندا تاۋەلسىزدىك مەرەكەسىنە وراي ۇلكەن ايتىس بولدى. شىمكەنت قالاسىنا ناۋرىزعا بايلانىستى ايتىسقا شاقىرىپ جاتىر.
