جەتى حاننىڭ سۇيەگى جاتقان سارايشىق قالاسى جويىلۋدىڭ از- اق الدىندا تۇر

تاريحي جادىگەرلەر مەن جەتى حاننىڭ سۇيەگى جاتقان سارايشىق قالاسى جويىلۋدىڭ از- اق الدىندا تۇر. دالادا قاراۋسىز، ەشكىمگە ەلەۋسىز قالعان تاريحي ورىن سۋ استىنا كەتىپ بارا جاتىر.

بۇل تۋرالى 31 - ارنا حابارلايدى.

كەشە وڭىرگە مينيستر ارىستانبەك مۇحامەدي ۇلىنىڭ ءوزى باردى. سوعان قاراعاندا، جەرگىلىكتى بيلىك بۇل ءىستى قولعا العانعا ۇقسايدى.

سارايشىقتى سۋ شايعالى بەرى تاريحشىلار دابىل قاققان بولاتىن. الايدا، سول جارتاس كۇيىندە قالعان كونە تاريحي ورىنعا بۇگىندە بيلىك باس اۋىرتقان سىڭايلى. جايىق وزەنى جاعالاۋىنداعى كونە قالانىڭ ىرگەسىن قىمتاپ، سارايشىقتى تولىق قالپىنا كەلتىرىپ، جاعالاۋىن بەكىتۋ جۇمىستارى باستالىپ كەتكەن.

«جيىرما جىل بويى شەشىلمەي جاتقان ماسەلەنىڭ مىنەكەي بيىلعى جىلى شەشىمىن تاۋىپ، جۇمىستىڭ باستالىپ كەتكەنى قۋانتادى. ۇلكەن ماسەلەنىڭ قوزعالعانىن بىلدىرەدى، شەشىمىن تابادى دەگەن سەنىم تۋعىزادى بىزگە»، - دەدى ارحەولوگ- عالىم زەينوللا ساماشيەۆ.

ارحەولوگتاردىڭ ايتۋىنشا، سارايشىقتى قالپىنا كەلتىرۋ جۇمىستارى جالعاسىن تابۋى كەرەك. سونىمەن قاتار، «وبلىستىق بيۋدجەتتەن ارنايى قارجى ءبولىنىپ، مينيسترلىك تاراپىنان قولداۋ تابىلاتىن بولسا، سارايشىق قالاشىعى اسپان استىنداعى مۇراجايعا اينالادى» دەدى. بۇعان مادەنيەت ءمينسترى دە قولدان كەلگەنىنشە كومەكتەسەمىز دەگەندى ايتتى.

«سارايشىقتى جىلدان- جىلعا شايىپ جاتقانى بار. قازىر دەرەۋ توقتاتىپ، ۇلكەن شارالار جاساپ جاتىر اكىمشىلىكتىڭ اتىنان. ءبىز مينيسترلىك كۇن جىلىعاننان كەيىن بىردەن جۇمىسقا كىرىسۋگە دايىنبىز»، - دەدى ق ر مادەنيەت جانە سپورت ءمينيسترى ارىستانبەك مۇحامەدي ۇلى.

بۇرىنعى قالانىڭ ورنىندا قازبا جۇمىستارى جۇرگىزىلىپ، قازىرگى ۋاقىتتا اينالاسى قورشالعان. كونە قالانىڭ ورنىن بولاشاقتا اسپان استىنداعى مۇراجايعا اينالدىرماق.