الماتىدا گەنەرال امانبايەۆ پەن ونىڭ سىبايلاستارىنان ءزاۋلىم ۇيمەن تىكۇشاققا دەيىن تاركىلەندى
گەنەرالدىڭ 35 سىبايلاسى دا بۇگىن ءارتۇرلى جازا ارقالادى. ال ولاردان تاركىلەنگەن دۇنيە- مۇلىكتە ەسەپ جوق. ءزاۋلىم سارايلار، ەليتالىق پاتەرلەر، قىمبات كولىكتەر، گەكتارلاعان تەلىمدەرى، ءتىپتى ەكى بىردەي تىكۇشاققا دەيىن بار. مۇنىڭ سىرتىندا جالعان فيرمالاردىڭ ەسەپ- شوتتارىنان 20 ميلليارد تەڭگە تابىلعان.
جەمقورلارعا توپ- توبىمەن ۇكىم كەسىلەتىن الماتىداعى اتىشۋلى س ي-18 تەرگەۋ قاپاسى وسى. بۇگىن دە مۇندا ينە شانشار ورىن جوق. ويتكەنى، اعايىن- تۋىستى ايتپاعاننىڭ وزىندە، ايىپتالۋشى ورىندىعىندا 36 ادام وتىر. ال باستى ايىپتالۋشى - الماتى قالالىق قارجى پوليتسياسىنىڭ بۇرىنعى باسشىسى ءامىرحان امانبايەۆ. قىلمىستىق توپ قۇرىپ، ارام جولمەن كەلگەن اقشانى زاڭداستىردى، ءىرى كولەمدە پارا الدى دەپ ايىپتالعان ول ەندىگى 14 جىلىن قاتاڭ رەجيمدەگى تۇرمەدە وتكىزۋى ءتيىس.
كەڭشىلىك ءابدىلدينوۆ، سۋديا:
- ءامىرحان امانبايەۆ 14 جىلعا باس بوستاندىعىنان ايىرىلسىن. سونداي- اق، ونىڭ ءومىر بويى باسشىلىق قىزمەت اتقارۋىنا تيىم سالىنادى. بۇدان بولەك 3- ساناتتى ادىلەت كەڭەسشىسى شەنى مەن «قۇرمەت»، «داڭق» وردەندەرىن قايتارىپ الۋ تۋرالى پرەزيدەنت اتىنا ۇسىنىس جولدانسىن.
سونداي- اق، بۇگىن امانبايەۆتىڭ 35 سىبايلاسىنا قاتىستى دا ۇكىم شىقتى. سوتتا ولاردىڭ تەك بىرەۋى عانا اقتالدى. ال باسقالارى ءارتۇرلى مەرزىمگە سوتتالىپ كەتتى. ەڭ اۋىر جازا ارقالاعانداردىڭ ءبىرى - سەرگەي يلين. ول ءوز كىناسىن ءىشىنارا مويىنداعانىمەن قىلمىستىق توپتىڭ جەتەكشىسى رەتىندە 16 جىلعا سوتتالدى. ال امانبايەۆ، تاعىلعان ايىپتاردىڭ بىرەۋىن دە مويىنداعان ەمەس. ادۆوكاتى دا سوتتا ناقتى ايعاقتار بولمادى دەگەن پىكىردە.
ءسالىمجان مۋسين، ءامىرحان امانبايەۆتىڭ ادۆوكاتى:
- امانبايەۆتىڭ ءىرى كولەمدە اقشا العانى دالەلدەنبەدى. ءتىنتۋ كەزىندە دە ودان قوماقتى قارجى تابىلعان جوق. كەرىسىنشە ول اقشا امانبايەۆقا قارسى تۇسىنىك بەرگەن بۇرىنعى قارجى پوليتسەيلەرىنەن تاركىلەندى. سوندىقتان سوت شەشىمىمەن كەلىسپەيتىنىمىزدى ايتىپ، اپەللياتسيالىق شاعىم تۇسىرەمىز.
اپەللياتسيالىق القاعا جۇگىنىپ اقتالىپ شىعۋعا 35 سوتتالۋشىنىڭ ءبارى مۇددەلى. ويتكەنى وسىعان دەيىن شالقىپ ءومىر سۇرگەندەر ءبىر- اق كۇندە بارىنان ايىرىلىپ وتىر. تاركىلەنگەن دۇنيە- مۇلىكتەردى ءتىزىپ شىعۋعا سۋديا ءتىپتى، ءبىر ساعاتتان استام ۋاقىت جۇمسادى.
قىلمىستىق توپتىڭ زاڭسىز جولمەن تاپقان تابىسى 19 ميلليارد تەڭگە. بۇل قىرۋار قارجى جالعان فيرمالاردىڭ ەسەپ- شوتتارىنان تابىلعان. سوندىقتان ءبىر اۋداننىڭ بيۋدجەتىنە پارا- پار ميللياردتار ەندى مەملەكەت مەنشىگىنە وتەتىن بولدى. سونداي- اق، سۋديا سوتتالۋشىلاردىڭ دۇنيە- مۇلكىن تاركىلەدى. اتاپ ايتقاندا ولاردىڭ بانك شوتتارىنداعى ميلليوندار، قىمبات كولىكتەرى، ءزاۋلىم سارايلارى تاركىلەنىپ وتىر. تىزىمدە ءتىپتى تىكۇشاقتار دا بار.
http://www.ktk.kz/kz
