وزبەكستان پرەزيدەنتى ناۋرىزدا قازاقستانعا مەملەكەتتىك ساپارمەن كەلەدى
تاشكەنتتە وزبەكستان مەن قازاقستان اراسىنداعى ەكىجاقتى ىنتىماقتاستىق بويىنشا 16- بىرلەسكەن ۇكىمەتارالىق كوميسسيانىڭ وتىرىسى ءوتتى. وتىرىس بارىسىندا 2017 -جىلعى ناۋرىزدا وزبەكستان پرەزيدەنتى شاۆكات ميرزييەۆ قازاقستانعا مەملەكەتتىك ساپارمەن كەلەتىنى بەلگىلى بولدى.
وزبەكستان پرەمەر- ءمينيسترىنىڭ ءبىرىنشى ورىنباسارى اچيلباي راماتوۆ بۇل ساپار ستراتەگيالىق ارىپتەستىكتىڭ جاڭا كەزەڭىن اشۋى ءتيىس ەكەنىن اتاپ ءوتتى.
قازاقستاندىق دەلەگاتسيانى باسقاراتىن پرەمەر- ءمينيستردىڭ ءبىرىنشى ورىنباسارى اسقار مامين ءوز سوزىندە ەكى ەلدىڭ ىنتىماقتاستىعى سەرپىندى دامىپ كەلە جاتقانىن، كەزەكتى وتىرىس ەكى تاراپتىڭ كوپ جوسپارلى ىنتىماقتاستىعىن نىعايتۋعا ىقىلاستى ەكەندىگىن راستايتىنىن اتاپ ءوتتى.
2016 -جىلدىڭ قورىتىندىسى بويىنشا وزبەكستان مەن قازاقستان اراسىنداعى تاۋار اينالىمى 2 ميلليارد دوللاردان استى.
