قازاق استىعىن مالايزياعا ەكسپورتتاۋ ءتيىمسىز - سارەكەنوۆ

استانا. قازاقپارات - قازاق استىعىن مالايزياعا ەكسپورتتاۋ ءتيىمسىز. بۇل تۋرالى بۇگىن ەلىمىزدىڭ سىرتقى ىستەر مينيسترلىگىندە ۇيىمداستىرىلعان باسپا ءسوز ءماسليحاتىندا قازاقستاننىڭ مالايزياداعى توتەنشە جانە وكىلەتتى ەلشىسى دانيار سارەكەنوۆ ءمالىم ەتتى، دەپ حابارلايدى قازاقپارات.

 «مالايزياعا استىق قاجەت. استىق تۇتىنۋ، بيدايدان جاسالعان ونىمدەردى تۇتىنۋ كولەمى ارتىپ كەلە جاتىر. مالايزياعا استىقتى نەگىزىنەن ا ق ش پەن اۆستراليا ەلدەرى جەتكىزەدى. ءبىز قازاقستاندىق استىقتى مالايزياعا ەكسپورتتاۋ ماسەلەسىن قاراستىرىپ كوردىك. وكىنىشكە وراي، قازىرگى تاڭدا بۇل كولىك شىعىندارىنىڭ جوعارى بولۋىنا بايلانىستى ەكونوميكالىق تۇرعىدا ءتيىمسىز. ءبىزدىڭ ەسەپتەۋىمىزشە، مالايزياعا قازاقستاننان جەتكىزىلگەن استىق قۇنى اۆستراليا استىعىنان 150 دوللارعا جوعارى بولادى. بۇل وتە قىمبات» ، - دەدى سارەكەنوۆ.

ەلشىنىڭ اتاپ وتۋىنشە، قازاقستان مەن مالايزيا اراسىنداعى ءوزارا ساۋدا- ساتتىق وتكەن جىلى 80 ميلليون دوللاردان اسىپ جىعىلعان. ەلىمىزدەن مالايزياعا نەگىزىنەن مۇناي- گاز سالاسىنا قاتىستى ماتەريالدار ەكسپورتتالادى.

«ەكى ەلدىڭ اراسىنداعى ساۋدا- ساتتىقتىڭ دامۋىنا مالايزيانىڭ شالعايدا ورنالاسۋى مەن كولىك شىعىندارىنىڭ جوعارىلىعى تەجەۋشى فاكتور بولىپ وتىر. دەگەنمەن، كەلەشەگى بار. ءبىراق جۇمىس ىستەۋ قاجەت. اسىرەسە ليانيۋنگان باعىتىنداعى جۇمىستاردى دامىتۋ كەرەك. بۇل باعىتتاعى باعدار داميتىن بولسا ەكىجاقتى تاۋار اينالىمىنىڭ كولەمى ەسەلەنە تۇسەتىندىگىنە سەنىمدىمىن. ويتكەنى، مالايزيالىق بيزنەسمەندەردىڭ، كولىكتىك- لوگيستيكالىق كومپانيالاردىڭ تاراپىنان قىزىعۋشىلىق بار» ، - دەدى ول.

 

اۆتور: مارلان جيەمباي