قىزىلوردادا قاراقۇيرىق اۋلاعان براكونەرلەر قولعا ءتۇستى
بۇل تۋرالى قازاقپارات ح ا ا ءتىلشىسى وبلىستىق ءى ءى د سىلتەمە جاساپ حابارلادى.
وقيعا اقپان ايىنىڭ 21 نەن 22 سىنە قاراعان ءتۇنى ساعات 05-00-دەر شاماسىندا ورىن العان. قىزىلوردا جەرگىلىكتى پوليتسيا قىزمەتى تابيعاتتى قورعاۋ پوليسيا ءبولىمىنىڭ قىزمەتكەرلەرى مەن قىزىلوردا ورمان جانە جانۋارلار دۇنيەسىن قورعاۋ مەملەكەتتىك مەكەمەسىنىڭ جەدەل توپ ماماندارىنىڭ بىرلەسىپ جۇرگىزگەن رەيدتىك جۇمىستارى بارىسىندا قىزىلوردا وبلىسى، سىرداريا اۋدانى، ىڭكارداريا اۋىلىنان وڭتۇستىك- باتىسقا قاراي 60 شاقىرىم قاشىقتىقتاعى دالالىق جەردە «Toyota Land-Cruiser» ماركالى اۆتوكولىگى توقتاتىلادى.
اۆتوكولىككە تەكسەرۋ جۇرگىزۋ بارىسىندا كولىكتىڭ جۇك سالعىشىنان 33 دانا قوياننىڭ جانە 2 دانا قاراقۇيرىقتىڭ ءولى دەنەلەرىن انىقتالدى. سونىمەن قاتار 2 دانا اڭشى مىلتىعى مەن 19 دانا وقتار ايعاق زات رەتىندە الىنىپ، تاركىلەندى.
وقيعا ورنىنان 1986 -جىلى تۋعان اۆتوكولىك جۇرگىزۋشىسى مەن 1985 -جىلى جانە 1992 -جىلى تۋعان جولاۋشىلار ۇستالىپ، ولارعا قاتىستى قازاقستان رەسپۋبليكاسى قىلمىستىق كودەكسىنىڭ 337-بابى 4-بولىگىمەن قىلمىستىق ءىس قوزعالدى. سوتقا دەيىنگى تەرگەپ- تەكسەرۋ جۇمىستارى جۇرگىزىلۋدە.
اۆتور: ەلۋباي اۋەزوۆ
