باقىت سۇلتانوۆ «قينالىپ» جۇرگەن كاسىپكەرلەرگە اقىل ايتتى

استانا. قازاقپارات - بۇگىن قارجى مينيسترلىگىنىڭ القا وتىرىسىن وتكىزگەن ۆەدومستۆو باسشىسى باقىت سۇلتانوۆ جەكە كاسىپكەرلەرگە ونلاين كاسسا اپپاراتتارىن ورناتسا، ولاردى ەشكىم تەكسەرۋمەن قيناي المايتىنىن ايتتى، دەپ حابارلايدى قازاقپارات ءتىلشىسى.

«مەملەكەت باسشىسى قاداپ ايتقان ماسەلەلەردىڭ ءبىرى - تەكسەرۋلەردىڭ سانى. بىلتىر وتكەن 76 مىڭ تەكسەرۋدىڭ تورتتەن ءبىرى، ياعني، 23 مىڭ تەكسەرۋ رەيدتتىك تەكسەرۋ بولدى. بۇل جەردە ءبىز مەملەكەتتىك ورگانداردىڭ اۋماقتىق بولىمشەلەرىنە پايداسى جوق بولسا، وسى رەيدتىك تەكسەرۋلەرگە شىقپاي- اق قويسىن دەگەن تاپسىرما بەردىك. تەكسەرۋلەردىڭ كوبى كاسسالىق اپپاراتتاردىڭ بار- جوعىن تەكسەرۋگە قاتىستى بولىپ وتىر»، - دەيدى مينيستر.

قارجى ءمينيسترى كاسىپكەرلەردى ونلاين كاسسا اپپاراتتارىن ورناتۋعا شاقىردى.

«وسى 23 مىڭ تەكسەرۋدى وتكىزبەي- اق قويساق تا بولار ەدىك. تۇتىنۋشىلار مەن قىزمەتتەرگە قاتىستى جۇمىس جۇرگىزسەك جەتكىلىكتى. تەكسەرۋ جۇرگىزەتىن ءاربىر ادام ءوز اۋماعىنداعى كاسىپكەرلەرمەن تىعىز جۇمىس ىستەپ، الدىن الا ەسكەرتۋ قاعازدارىن تاراتسا، جەتكىلىكتى. مەن دە قازىر كاسىپكەرلەرگە ءوز ويىمدى ايتقىم كەلىپ تۇر. سىزدەردەن وتىنەرىم، كاسسالىق اپپاراتتى ورناتىڭىزدار، سوندا سىزدەردى ەشكىم تەكسەرە المايدى، رەيدتىك تەكسەرۋ وتكىزىپ، قينامايدى»، - دەيدى مينيستر.

اۆتور: كەنجەكەي توقتامۇرات قىزى