سينحروندىق ءجۇزۋ: سپورتتىق مانسابىن اياقتاعان ارۋلار جاتتىقتىرۋشىلارىنا نەگە نارازى

استانا. قازاقپارات - سۋ سپورتىنىڭ سينحروندى ءجۇزۋ تۇرىنەن قازاقستان قۇراماسىنىڭ قاتارىندا ەل نامىسىن قورعاپ، بۇگىنگى تاڭدا سپورتتىق مانساپتارىن اياقتاعان ارۋلارىمىز الەۋمەتتىك جەلىلەردە اشىق حاتتار جازىپ، ۇلكەن داۋ تۋدىرعانى بارشامىزعا بەلگىلى.

تاياۋدا عانا prosports.kz ينتەرنەت- باسىلىمى اتالعان جايتقا بايلانىستى ارۋلاردان سۇحبات العان بولاتىن. سونىمەن قاتار، كۇنى كەشە اتالعان باسىلىمعا تاعى ءبىر ارۋىمىز سۇحبات بەرىپ، ماسەلەنىڭ ءمان- جايىن اشىپ بەرەتىن مالىمەتتەردى جەتكىزگەن بولاتىن. سونىمەن، از ۋاقىت ىشىندە ۇلكەن داۋلى ماسەلەگە اينالعان جايتتىڭ انىق- قانىعىنا كوز جەتكىزۋ ءۇشىن نازارلارىڭىزعا وسى سۇحباتتاردى قاز- قالپىندا ۇسىنۋدى ءجون كورىپ وتىرمىز.

اينۇر كەرەي: «ازيادادا ماعان بوس قوراپ بەرىلدى»

سينحروندى جۇزۋدەن ۇلتتىق قۇرامانىڭ بۇرىنعى مۇشەلەرى ايگەرىم جەكسەمبينوۆا، ايسۇلۋ ناۋرىزبايەۆا، ايگەرىم يسايەۆا، امينا ەرماحانوۆا مەن اينۇر كەرەي- بايماحانوۆا prosports.kz تىلشىسىنە سۇحبات بەرىپ كومانداداعى «سۇمدىق» وقيعالار تۋرالى ايتتى.

«نەگە سەندەردە بۇل كيىمدەر بار، بىزدە جوق؟»

ايگەرىم يسايەۆا:

- 9 جاستان سينحروندى جۇزۋمەن اينالىسىپ كەلەم. مەنىڭ العاشقى ءىرى جارىسىم 2006 -جىلعى - ازيا ويىندارى. ول كەزدە 4- ورىن الدىق، سودان باستاپ شىعىنعا باتتىق. سۋدا جۇزۋگە ارنالعان كيىمدى ءوزىمىز تىكتىرىپ، ساقتاندىرۋ مەن ۆيزاعا ءار جارىس سايىن اقشا شىعاردىق. جاس بولعاندىقتان كوپ نارسەنى تۇسىنبەدىك، جارىسقا بارۋ شارتتارى سولاي ەكەن دەپ ويلادىق. بىزگە سىرت كيىمدى دە بەرمەدى. بىزبەن قاتار جۇرەتىن سۋ دوبى قۇراماسى شىرتتاي كيىنگەندە تاڭ قالاتىنبىز: «نەگە سەندەردە بۇل كيىمدەر بار، بىزدە جوق». ءبارىن تۇگەلدەي ءوز اقشامىزعا الدىق دەپ ايتا المايمىن، ءبىراق، ماسەلەن 2013 -جىلى بارسەلوناعا كەتەردە ارنايى كيىمدى جەكە قاراجاتقا تىكتىردىك. ءاربىر كۋپالنيكتىڭ باعاسى كەمىندە 400-450 دوللار.

قازىرگى كىشكەنتايلار (جاسوسپىرىمدەر)، قالتادان اقشا شىعارىپ جاتقان جوق، ءبىزدىڭ كەزدە باسقاشا ەدى. ياعني، تاماققا، جولعا، جاتار ورىندارعا شىعىندالدىق. مىنانداي قىزىقتار دا بولعان، 10 ادام بولىپ جارىسقا بارا جاتامىز، ءبىراق ءبۇتىن ۆاگونعا تولەنىپ قويعان، كۋپەلەر بوس بولدى. «نەگە ولار بوس؟»، - دەپ سۇراعانىمدا، ولاردىڭ «جوق» قىزدارعا الىنعانىن ءبىلدىم. سەبەبى، ءار بيلەت سپورتشىلاردىڭ جيىنعا قاتىسقانىن بىلدىرەدى. ءبىراق ول ادام جيىندا بولماعان، ال، تىزىمدە بار. ءبىز تاماقتانعانىمىز ءۇشىن قول قويامىز. استاناداعى جيىندا تاماعىمىز ونشا بولمادى. جيىنعا قانشا اقشا بەرگەنىن بىلمەيمىز، ءبىراق تاماققا ودان از جۇمسالعانىنا كۇمانىم جوق. مەن سپورتشىلارعا كۇنىنە 1000 تەڭگەدەن بەرەدى دەپ ويلامايمىن.

ءبارىن جاننا گەنناديەۆنا دەمچەنكو باسقارادى. قارجىلىق ماسەلە بويىنشا تولىقتاي ءوزى قوجا. ۇلتتىق شتتاتتىق كوماندالار ديرەكسياسى نەمەسە وليمپيادالىق دايىندىق ورتالىعى ما، بىزگە اقشانى كىم بولگەنىن بىلمەدىك. ءبىز سۇراعانىمىزدا، «بىلمەيمىز»، - دەپ جاۋاپ بەرەتىن. كوپ سۇراق قويعان سايىن، شەتتەتە باستايدى. «كەتىڭدەر»، «كوپ سۇراق قويۋدىڭ قاجەتى جوق» دەپ ايتاتىن. ياعني، بىزدەگى اقشا بولمەۋ، تولىق بەرمەۋ، ءبولىسۋ قالىپتى جاعداي بولاتىن. توپقا ۇنەمى ءبىر قىزداردى قوساتىن... ناتيجەنى جاقسارتۋ ءۇشىن باسقا قىزدى تاپپاي، ونىڭ ورنىنا وزىنە پايدالى، وزىنە ۇنايتىن قىزدى «تىعاتىن». سوڭعى قالعاندارى ءبىز شىعارمىز. «جاننا گەنناديەۆنا، نەگە بىزگە جالاقى بەرمەيدى؟ نەگە ارنايى كيىم مەن ساقتاندىرۋعا ءبىز ءوزىمىز تولەيمىز؟»، - دەپ ۇنەمى سۇرايتىنبىز. ول: «بۇل سۇراقتاردى ماعان قويماڭدار. مەن بىلمەيمىن»، - دەپ جاۋاپ بەردى. سودان كەيىن ءبىز ءاليا كاريموۆانىڭ (باپكەر) جۇمىسىنا كوڭىلىمىز تولمايتىنىن ايتتىق. ولار بىزبەن جارىسقا كەلەدى، باسقا ەلدەردى كورەدى، ال ءبىزدىڭ جاتتىعۋ جۇيەمىز وزگەرەدى. سوندا تەك قارجىلىق جاعىنان ەمەس، كاسىبيلىگىنە دە كوڭىلىمىز تولمايدى. باپكەرلەر ءوزىن سارپىپ قانا قويمادى. ولارعا ەندى بۇل قىزىق تا ەمەس.

«تەك ءبىر رەت 10 نەمەسە 20 دوللار الدىق»

ايگەرىم جەكسەمبينوۆا:

- قارجىلىق جاعىنان ءبىزدىڭ قوياتىن سۇراعىمىز كوبىرەك. مەن، امينا جانە تاعى ەكى قىز استانا اتىنان جارىسقا تۇستىك. قالعانى قاراعاندى، الماتى ت. ب قالالار ءۇشىن سىنعا ءتۇستى. ءبىز ەكەۋمىز (ەرماحانوۆامەن) استانادان جالاقى دا، ازيا ويىندارى ءۇشىن سىياقى دا المادىق. وسى ماسەلە بويىنشا دا ول: «بۇل مەنىڭ مالەسەم ەمەس. قاجەت بولسا، باسشىلىقپەن شەشىڭدەر»، - دەپ ايتقان ەدى. كىم قاي قالانىڭ اتىنان شىقسا، سول قالادان جالاقى الۋى ءتيىس بولىپ شىقتى. مىسالى، جيىن وليمپيادالىق دايىندىق ورتالىعىنىڭ ەسەبىنەن وتسە دە، ءبىز سول ءۇشىن اقشا الۋىمىز ءتيىس ەدى.

«ونى وزىمىزگە تارتايىق، اتا-اناسىندا اقشا بار. مۇمكىن ولار بىزگە دەمەۋشى بولادى»

ايگەرىم يسايەۆا:

 - ءاليا كاريموۆانىڭ سپورتتىق ءبىلىمى بار. ال، دەمچەنكونىڭ ءبىلىمى بار دەپ ايتا المايمىن. ەگەر، ول قوسىمشا ءبىلىم الماسا، وندا ونىڭ سپورتتىق ءبىلىمى جوق ەكەنىنە سەنىمدىمىن.

 ءبىز، اسىرەسە بالا كەزىمىزدە، وسى ءسوزدى ءجيى ەستيتىنبىز: «سەندەر مەنىڭ ەسەبىمەن تاماق ءىشىپ جۇرسىڭدەر. مەن ءوز قالتامنان تولەيمىن. ساعان دا، ساعان دا. سەندەر مەنىڭ ەسەبىمەنەن تاماقتانىپ جۇرسىڭدەر».

ياعني، ءبىز ونىڭ ەسەبىنەن تاماقتاناتىنداي ونىڭ قانشالىقتى قارجىلاي مۇمكىندىگى بولعانىن بىلمەيمىن.

بىزدە سپورتپەن اسا كوپ اينالىسپاعان باپكەرلەر كوپ. ءۇش- ءتورت جىلدان عانا. ارنا توقتاعان، اينۇر كەرەي بار كەزدە ولار بالالارعا نە بەرە الادى؟ ارتىق سۇراق قويماي، ەشتەڭە سۇرامايتىن جانە تىنىش جۇرەتىن ادامداردى عانا الادى.

بىزدە باي وتباسىنان كەلگەن بالا كەلسە، ونى بىردەن «تارتۋعا» تىرىسادى. مەن ولاردىڭ اقشا تولەگەنىن نەمەسە تولەمەگەنىن بىلمەيمىن. ءبىراق، بىزدە: «ونى وزدەرىڭە تارتىڭدار. ونىڭ اتا- اناسىندا اقشا بار. مۇمكىن ولار بىزگە دەمەۋشى بولادى»، - دەگەن سوزدەر جۇرگەن.

ءبىز ۇلتتىق جانە شتاتتىق كوماندالار ديرەكسياسىنىڭ قۇرامىندا بولعان كەزدە، 2013 -جىلى، جالاقى 75-80 مىڭ تەڭگەنى قۇرادى. ال ارنايى سۋعا ارنالعان كيىمدەر 400 دوللار تۇراتىن. سول كەزدىڭ وزىندە بۇل وتە قىمبات ەدى.

«باپكەرگە سىيلىق الۋ كەرەك. 10 مىڭ تەڭگەدەن جينايمىز»

ايگەرىم جەكسەمبينوۆا:

- بىزدە باپكەرگە قىمبات سىيلىق سىيلاۋ داستۇرگە اينالعان. ءبىز ۇلتتىق جانە شتاتتىق كوماندالار ديرەكسياسىندا تۇرماعان كەزىمىزدە، جالاقى الماعان ۋاقىتتا، باپكەرگە گاۋھار سىرعا مەن 250-300 مىڭ تەڭگەگە شاڭسورعىش سىيلاۋ ءۇشىن بىزدەن 10 مىڭ تەڭگەدەن جينايتىن. باپكەرلەر: «10-15 مىڭنان جيناپ، باپكەرگە سىيلىق الۋىمىز كەرەك»، - دەپ ايتاتىن. ال، ءبىز ونداي اقشامىز جوق ەكەنىن ايتىپ، قارسىلىق كورسەتكەنىمىزدە: «سەندەر جالعىز باپكەرلەرىڭە جىلىنا ءبىر رەت سىيلىق الا المايسىڭدار ما؟»، - دەپ ايتاتىن. وسىلاي جىل سايىن جالعاساتىن. ءتىپتى، وسى كۇنگە دەيىن جالعاسىپ كەلەدى. 2012 نەمەسە 2013 -جىلى بىزگە ول كىسىنىڭ كومپيۋتەرى جوق ەكەنىن ايتىپ، ەسكى كومپيۋتەرىنىڭ ورنىنا جاڭاسىن سىيلاڭدار دەپ ايتقان كەزدە، ءبىز ءوز اتىمىزدان سىيلىق جاسايمىز دەپ ايتقان بولاتىنبىز. ءبىز وعان گۇل، تورت الىپ، قۇتتىقتاۋعا بارعان كەزىمىزدە، كاريموۆا بىزگە ۇزاق ۋاقىت بويى رەنجىپ ءجۇردى. ۇرىس شىعارىپ، ايقايعا باسقان بولاتىن.

«مەن قۇجاتقا قول قويدىم، ال ول مەنىڭ جالاقىمدى الدى»

اينۇر كەرەي:

- قازاقستاننىڭ ەڭ ۇزدىك سپورتشىسى ارنا توقتاعان مانسابىن اياقتاعاننان كەيىن ۇلتتىق قۇراماعا كومەكتەسۋ ءۇشىن باپكەرلىك جۇمىسقا سۇرانعان ەدى. بۇل - بارلىق ەلدەردە بار تاجىرەيبە. سپورتشى مانسابىن اياقتاعاننان كەيىن ۇلتتىق قۇراماعا كومەكتەسەدى. اسىرەسە، ول ءوز ەلىنىڭ ۇزدىگى بولسا. ءبىراق، وعان جاننا گەنناديەۆنا: «ءاليا كاريموۆا سەنىڭ كومەگىڭ كەرەك ەمەس دەپ ايتتى»، - دەپ جاۋاپ بەرگەن. ونىڭ ورنىنا بەلگىسىز بىرەۋلەردى الادى. ارنا وسىدان كەيىن سپورتقا قايتا ورالىپ، دەمچەنكو تارتقانداردان مىقتى ەكەنىن دالەلدەپ، ەرماحانوۆا امينامەن بىرگە الەم چەمپيوناتىندا ولاردى جەڭگەن بولاتىن.

مەن دە مانسابىمدى اياقتادىم. مەنى مانسابىمدى اياقتاۋعا ماجبۇرلەدى. «اينۋرا، بولدى، جەتەدى ەندى»، - دەدى. مانسابىمدى اياقتاعاننان كەيىن، قۇراماعا كومەكتەسكىم كەلدى. وسى سالادا قالىپ، تەك كومەكتەسكىم كەلەدى دەپ ايتتىم. ءبىراق جاننا گەنناديەۆنا ارناعا ايتقانىن ماعان دا قايتالادى. مەنىڭ ورنىما جوعارى ءبىلىمى تولىق ەمەس قىزداردى الدى.

سپورتتىق مانسابىمىزدىڭ بارىسىندا ءبىز ەشقاشان تاۋلىكتىك اقشا المادىق جانە بۇنى قالىپتى جاعداي دەپ سانادىق. جيىنعا بارعان كەزدەرى تاماقتانۋىمىز قاجەتتى سمەتاعا سايكەس بولمادى. ءبىز ءار جارىستا تاۋلىكتىك اقى، سىياقى الۋىمىز ءتيىس ەكەنىن جاقىندا عانا ءبىلدىم.

مەن جاننا دەمچەنكونىڭ سۇحباتىن وقىدىم. ول ءبىز جىل سايىن سپورتتىق كيىم الاتىنىمىزدى ايتىپتى. مەن بۇل سوزگە تاڭعالدىم. سەبەبى، ءبىز الەم چەمپيوناتىنان كەيىن سپورتتىق كيىمىمىزدى ساقتاپ جۇردىك. سول كيىممەن باسقا جارىستارعا قاتىستىق. سەبەبى، بىزگە نەشە جىلدان كەيىن سپورتتىق كيىم بەرىلەتىنى بەلگىسىز ەدى. سۋعا ارنالعان كيىمدى ءبىز بىرنەشە رەت ءبىز ءوزىمىز ساتىپ الدىق.

دوحاداعى جارىستا مەن قوسالقى قۇرامدا بولدىم. ءبىراق ماراپاتتاۋ كەزىندە مەن دە شىعۋ كەرەك ەدىم. ءبىراق ماعان: «كەرەك ەمەس»، - دەپ ايتتى. سودان كەيىن مەن بوس قوراپ الدىم. ىشىندە مەدال جوق ەدى. جۇلدە قايدا دەپ سۇرادىم. ولار ماعان: «بۇل -  جاننا گەنناديەۆناعا ەستەلىك سىيلىق»، - دەپ جاۋاپ بەردى. مەن بۇنى قالىپتى جاعداي دەپ ويلادىم. ءبىزدىڭ كومانداداعى وسىنداي جاعدايلار قالىپتى جاعداي رەتىندە قابىلداناتىن. مەنىڭ كىشكەنتاي كەزىمدە، 12 جاسىمدا، مەن ەرتە قۇراماعا ءىلىندىم، جاننا گەنناديەۆنا قۇجاتقا قول قويدىرىپ، جالاقىمدى الاتىن. بۇل 8 ايعا سوزىلدى. ولار: «سەن قاجەتتى دەڭگەيدە جاتتىقپايسىڭ. اقشا كەرەك. سەنىڭ اقشاڭدى سينحروندى ءجۇزۋدىڭ قاجەتتىلىگىنە جۇمسايمىز»، - دەپ ايتتى.

ايسۇلۋ ناۋرىزبايەۆا:

- ءبىز قوسالقى قۇرامداعى سپورتشىلاردىڭ مەدالىن سىيعا بەرەتىنبىز. بۇل دا قالىپتى جاعداي رەتىندە قابىلداناتىن. مەن بۇنى دۇرىس پا، جوق پا بىلمەيمىن. مىسالى، قوسالقى قۇرامداعى قىز، ءبىز ونىڭ مەدالىن باس باپكەرگە سىيلاۋىمىز كەرەك نەمەسە كاريموۆاعا نەمەسە دەمچەنكوعا. بۇل العىستىڭ ورنىنا دەپ قابىلداناتىن. جارىستان كەيىن سىيلىق بەرەتىنبىز.

اينۇر كەرەي:

- بۇل شىن كوڭىلدەن ەمەس، بوپسالاۋ سياقتى بولاتىن. مىسالى، «مىنانى سىيلاڭدار، ونىڭ قىزىنا «ايپاد» كەرەك»، - دەپ ايتاتىن.

ءبىز ءۇشىن بۇل وكپە- رەنىش - بونۋس رەتىندە. ال، نەگىزگىسى - قارجىلىق ماسەلە.

كۋلكينا: «قۇزىرلى ورگاندار تەرگەۋ جۇمىستارىن اياقتاپ، شەشىمىن بەرسىن»

سينحروندى جۇزۋدەن ۇلتتىق قۇرامانىڭ بۇرىنعى مۇشەسى اننا كۋلكينا prosports.kz تىلشىسىنە ەكسكليۋزيۆتى سۇحبات بەردى.

ازيا ويىندارىنىڭ ەكى دۇركىن قولا جۇلدەگەرى، بىرنەشە دۇركىن قازاقستان چەمپيونى جانە حالىقارالىق دارەجەدەگى سپورت شەبەرى اننا كۋلكينا ارىپتەستەرى جازعان اشىق حاتقا بايلانىستى ءوز پىكىرىن بىلدىرگەن.

- جاقىندا سينحروندى جۇزۋدەن ۇلتتىق قۇرامانىڭ بۇرىنعى مۇشەلەرى اشىق حات جازىپ، الەۋمەتتىك جەلىدە ويلارىن جەتكىزدى. سپورتشى قىزدار كەيبىر جەردە شىندىقتى ايتسا، كەيدە جەردە شىندىقتى جاسىرعان.

كوماندامىزدا جاقسى ناتيجەلەر جوق دەگەنى شىندىققا ۇيلەسپەيدى. دالەلدەرگە جۇگىنسەك، 2016 -جىلى توكيو قالاسىندا وتكەن ازيا چەمپيوناتىندا سينحرونشى قىزدارىمىز 5 قولا مەدال يەلەنگەن. ال كەشىرەك حالىقارالىق تروفي تۋرنيرىنىڭ حايلايتس سايىسىنان قولا مەدال ۇتىپ الدى جانە ريو-2016 وليمپياداسىندا 15-ورىندى ساقتاپ قالدىق. دەمچەنكو جاننا گەنناديەۆنانى ءاردايىم تەرگەۋگە شاقىرۋىنا بايلانىستى ۇلتتىق قۇرامانىڭ جاتتىعۋ جۇمىسى مەن و ج ج بۇزىلدى.

كوماندادا «سۇيىكتىلەر» بولدى دەپ ايتۋعا نەگىز جوق. 2000 -جىلى شاتنايا گالينا مەن كاريموۆا اليا دۋەتى، 2004 -جىلى توقتاعان ارنا - كاريموۆا اليا، 2008 -جىلى توقتاعان ارنا - كەرەي اينۇر، 2012 -جىلى كۋلكينا - جەكسەمبينوۆا دۋەتتەرى بولسا، تەك 2016 -جىلى ەگىز نەميچتەر دۋەتى ونەر كورسەتتى. 2008 -جىلى مەن وليمپيادا ليسەنزياسىن ۇتىپ العانىمدا، بەيجىڭگە كەرەي اينۇردى اپاردى. سول سەبەپتى «سۇيىكتىلەر» بولدى دەگەنمەن كەلىسپەيمىن.

جارىستارداعى تاۋلىكتىك اقشامىز 2000 - 2004 -جىل ارالىعىندا تولەنبەگەنى راس. ول كەزدە قارجىلاي كومەك بولمادى. ءبىر جەردە جاتتىعۋ جيىندارى بولسا، ءوز قالتامىزدان شىعارىپ وتىردىق. ال 2008-2012 -جىل ارالىعىن الاتىن بولساق، تاماقتانۋ، تاۋلىكتىك اقشا جانە جولىمىزدىڭ شىعىنى بارلىعى تولىقتاي تولەندى. ايگەرىم جەكسەمبينوۆا ايتقانداي دوحادا 10-20 دوللار العانىمىز ەسىمدە. ال كەلەسى ازيا ويىندارىندا بەرىلگەن جوق. سەبەبى ۇلكەن جارىستاردىڭ تاۋلىكتىك اقشاسىن باپكەر ەمەس شتات تابىستاپ بەرەدى. 2008 -جىلعى پەكين وليمپياداسىنا 100 دوللار كولەمىندەگى تاۋلىكتىك اقشانى شتاتتان ۆەدوموسقا قول قويىپ الدىق. مەن ول كەزدە باپكەر رەتىندە بارعان ەدىم.

جەڭىستەرىمىز ءۇشىن سىياقىمىزدى ءاردايىم الىپ تۇردىق. ماسەلەن، 2006 -جىلعى دوحاداعى ازيا ويىندارىنىڭ قولا جۇلدەسى ءۇشىن 800 ا ق ش دوللارىن الدىم، ال 2010 -جىلعى ازيا ويىندارىنىڭ قولاسى ءۇشىن بارلىق كوماندا مۇشەلەرى مەملەكەتتەن 3000 دوللاردان الدى. ەسىمنەن شىقپاسا سول كەزدە ەڭ ءبىرىنشى تەمىرتاۋ سپورتشىلارىن قۇتتىقتادى. ولارعا نوۋتبۋكتەر بەرىلگەن. ال الماتىلىق سپورتشىلارعا مەدەۋدە كونسەرت قويىلىپ، سوڭىنان 1500 دوللار سىياقى بەرىلدى. استانانى نەگە ماراپاتتاعانىن بىلمەيمىن. الايدا، كەيىننەن استانانىڭ اتىنان شىققان سپورتشىلاردى جاقسى «اديداس» كيىم- كەشەگىمەن باستان اياق كيىندىرگەن.

ءجۇزۋ كيىمدەرىن 3 رەت ءوز قاراجاتىمىزعا العانىمىز انىق ەسىمدە. 2002-2003 -جىلدارى ءجاسوسپىرىم بولعان كەزدە 30-40 دوللارعا تىكتىك. سوسىن 2006 -جىلى 10000 تەڭگەگە تىكتىرتتىك. ال قۇنى 400 دوللار تۇراتىن ءجۇزۋ كيىمدەرىن ساتىپ العانىمىز وتىرىك. قىزدار ايتىپ وتىرعان 2013 -جىلعى بارسەلوناداعى حالىقارالىق تۋرنيردە ساتىپ العانىمىز راس. ءبىراق كيىمدەردى تىكتىرۋ ويىن سول يسايەۆا ايگەرىم مەن جەكسەمبينوۆا ايگەرىم ۇسىندى. ەشكىم ماجبۇرلەگەن جوق. ونىڭ قۇنى 400 دوللار ەمەس، جاڭىلىسپاسام 250 دوللاردى قۇرادى.

جاتتىعۋ جيىندارىنا بارعان كەزدە پويىزدا بوس ورىندار بولعانى راس. كەيدە تۋعان تۋىستارىمىزبەن كەزدەسۋ ءۇشىن ۇشاقپەن تەزىرەك بارۋعا تۋرا كەلەدى، ال پويىزعا الىنعان بيلەتتى قايتا تاپسىرۋعا مۇمكىندىك بولا بەرمەيدى. سول سەبەپتى پويىزدەردە بوس ورىندار پايدا بولا باستايدى.

مەدالداردى سىيلاۋ ماسەلەسىنە كەلسەك، ول اركىمنىڭ ءوز ەركى. بەرگىڭ كەلسە بەر، بەرمەسەڭ ەشكىم سەنەن جۇلىپ المايدى عوي.

سپورتتا جۇرگەن سوڭ ادامدارعا مەيىرىمدى بولۋ كەرەك. كىنانى بىرەۋدەن عانا ىزدەي بەرمەي، وزىڭە دە قاراۋ كەرەك. باپكەرىمىزدىڭ اقشا جىمقىرۋى جايلى ايتۋ ءالى ەرتە. قولدا ناقتى دالەل بولماي تۇرىپ باپكەرگە جالا جابا المايمىن، ونى جاقتامايمىن دا. قۇزىرلى ورگاندار تەرگەۋ جۇمىستارىن اياقتاپ ءوز شەشىمىن بەرسىن.

 دەرەككوزى: https://prosports.kz