قازاقستاندىق مەكتەپ وقۋشىسى «قاراجورعا» بيلەيتىن روبوت قۇراستىرىپ شىقتى - ۆيدەو

استانا. قازاقپارات - قازاقستاندىق مەكتەپ وقۋشىسى مىڭ بۇرالىپ قازاقتىڭ ۇلتتىق ءبيى «قاراجورعانى» بيلەيتىن تەمىر روبوت قۇراستىرىپ شىعاردى دەپ قازاقپارات حابارلايدى.

سەمەي قالاسىنداعى نازاربايەۆ زياتكەرلىك مەكتەبىنىڭ 11 -سىنىپ وقۋشىسى ءادىل وردايەۆ ەرەكشە روبوتتى مەكتەپتەگى روبوتوتەحنيكا ساباعىندا قۇراستىرعان. قۇراستىرۋ جۇمىستارى اياقتالعاننان كەيىن بارىپ ولارعا ارنايى باعدارلامالار ەنگىزگەن. وسىلايشا ءبىر ايعا سوزىلعان ۋاقىت ىشىندە ءبيشى روبوتتار دا دايىن بولىپتى.

ءادىلدىڭ جەتەكشىسى، ۇستازى باقىتبەك ورىنبايەۆ 18 بولشەكتەن قۇرالعان موتوردى ۇلتتىق ءبيدىڭ ىرقىنا كوندىرۋ وڭايعا تۇسپەگەنىن ايتادى.

«الايدا تالماي ىزدەنىپ، تاباندىلىق كورسەتۋ ارقىلى ناتيجەگە جەتتىك دەيدى. روبوتتى تەك قانا بيلەتكىزبەي وعان جان بەرۋ كەرەك دەپ ويلايمىن. سوندىقتان ءبىز روبوتتاردى بيلەتكىزۋ كەزىندە ءاربىر قوزعالىستى ساقتاۋ كەزىندە ءوزىمىزدىڭ جۇرەگىمىزدىڭ كىشكەنە بولىگىن بەردىك دەپ سانايمىز. بولاشاقتا ولار تەك قانا «قاراجورعا» عانا ەمەس، «قاماجاي» بيلەرىن دە بيلەيدى دەگەن ويدامىن»، - دەيدى جاس ونەرتاپقىش ءادىل وردايەۆ.

ءادىلدىڭ روبوتوتەحنيكا سالاسىنا مويىن بۇرعانى بيىل عانا ەمەس. 4 جىلدان بەرى وسى سالانىڭ قىر-سىرىن مەڭگەرگەن وقۋشى ءتۇرلى بايقاۋلارعا دا قاتىسىپ ۇلگەرىپتى. مىسالى، جاقىندا عانا «استانا» كونسەرت زالىندا «ۇلى دالا مۇراگەرلەرى» اتتى كورمە- قويىلىمدا وتكەن نازاربايەۆ زياتكەرلىك مەكتەپتەرىنىڭ تالانتتى وقۋشىلارىنىڭ عىلىمي جوبالارى كورمەسىندە ءوزى جاساپ شىققان روبوتتاردى تانىستىردى.