08:57, 23 - اقپان 2017 | GMT +5
پۋتيننىڭ عالامتور بويىنشا كەڭەسشىسىنىڭ پاراقشاسىن بۇعاتتادى
استانا. قازاقپارات - رەسەي پرەزيدەنتىنىڭ عالامتوردى دامىتۋ ماسەلەلەرى جونىندەگى كەڭەسشىسى گەرمان كليمەنكونىڭ فەيسبۋكتاعى پاراقشاسى اۆتورلىق قۇقىقتى بۇزعانى ءۇشىن بۇعاتتالدى.
بۇل تۋرالى dw.com حابارلادى. فەيسبۋك الەۋمەتتىك جەلىسى ر ف پرەزيدەنتىنىڭ عالامتوردى دامىتۋ ماسەلەلەرى جونىندەگى كەڭەسشىسى گەرمان كليمەنكونىڭ پاراقشاسىن ءۇش كۇنگە بۇعاتتاعان بولاتىن. بۇل تۋرالى كليمەنكونىڭ ءوزى VK الەۋمەتتىك جەلىسىندەگى پاراقشاسىندا بۇعاتتاۋ تۋرالى حابارلامانىڭ سكرينشوتىن جاريالادى.
فەيسبۋك كليمەنكونى وزگە تۇلعالاردىڭ اۆتورلىق قۇقىعىنا نۇقسان كەلەتىن ماتەريالداردى جاريالاعانى ءۇشىن جازالادى. كەڭەسشىنىڭ ءوزى بىرنەشە رەت پاراقشاسىنا جازبالارىن جاريالاعان تانىمال بلوگەر جانە اسپاز ستاليك حانكيشەۆ جەلى اكىمشىلەرىنە شاعىمداندى دەپ ەسەپتەيدى. ەسكە سالا كەتسەك، بۇرىن كليمەنكو رەسەيدىڭ اقپاراتتىق قاۋىپسىزدىگى ءۇشىن قىتايلىق تاجىريبەنى قولدانا وتىرىپ، رەسەيلىكتەردىڭ عالامتورداعى مۇمكىنشىلىكتەرىن شەكتەۋ تۋرالى ۇسىنىس جاساعان ەدى.
