كاشمير بيلىگى ۇلان-اسىر توي جاساۋعا تىيىم سالدى

استانا. قازاقپارات - ءۇندىستاندىق جاممۋ جانە كاشمير شتاتىندا ساۋىردەن باستاپ ۇلان- اسىر توي جاساۋعا تىيىم ەنگىزەدى.

قالىڭدىقتىڭ اتا-انالارى 500 دەن ارتىق قوناق شاقىرا المايدى، ال كۇيەۋ جاعىنان شاقىرىلعان قوناقتار سانى 400 ادامنان اسپاۋى ءتيىس. بۇدان باسقا، تويدا ىسىراپقا جول بەرمەس ءۇشىن جەتى نەگىزگى تاعامنان ارتىق اس بەرىلمەيدى.

وڭىرلىك پارلامەنت مۇشەلەرىنىڭ ءبىرى بۇل تىيىمدى ءۇندىستاننىڭ بارلىق اۋماعىنا تاراتۋدى ۇسىندى. وكىم ۇيلەنۋ تويلارىنداعى ابىر-دابىر شۋعا، تاعامداردىڭ ىسىراپ بولۋىنا بايلانىستى ازاماتتاردان كوپتەگەن شاعىمدار تۇسكەن سوڭ قابىلدانعان.

بۇل تىيىم 1984 -جىلى ەنگىزىلگەن بولاتىن، الايدا جاپپاي نارازىلىقتار بولعان سوڭ، الىپ تاستالعان. سوڭعى جىلدارداعى ۇلان- اسىر جاسالعان ۇيلەنۋ تويلارى: 2004 -جىلى ءۇندىستاندىق ميللياردەر لاشكمي ميتتالدىڭ قىزى ۆانيشي ميتتالدىڭ تويىنا 74 ميلليون دوللار جۇمسالعان. Forbes دەرەكتەرىنە سايكەس، 1000 قوناق جاڭا وتاسقانداردىڭ وتباسى ەسەبىنەن فرانسياعا جىبەرىلگەن، وزدەرى ءراسىمدى ۆەرسالدا باستاعان.

حانزادا چارلز بەن حانشايىم ديانانىڭ تويى 1981 -جىلى بولدى. كەي دەرەكتەرگە سايكەس، توي 30 ميلليون فۋنتقا جاسالعان. ونىڭ ۇلى حانزادا ۋيليامنىڭ نەكە قيۋ ءراسىمى ءسال ارزانداۋ - 20 ميلليون فۋنتقا تۇسكەن، دەپ جازدى Daily Mail. وتكەن جىلى ناۋرىزدا ماسكەۋدە ميللاردەر ميحايل گۋسەريەۆتىڭ ۇلى سايد گۋسەريەۆ پەن حاديجا ۋجاحوۆانىڭ تويى ءوتتى. MailOnline حابارلاعانداي، قالىڭدىقتىڭ كويلەگىنىڭ ءوزى 1,2 ميلليون دوللار تۇرعان. تويعا ارتىستەر دجەننيفەر لوپەس، ستينگ جانە ەنريكە يگلەسياس شاقىرتىلعان.