جەڭىلىس تاۋىپ كورمەگەن بريتاندىق بوكسشى قازاق بوكسشىسىمەن كەزدەسكىسى كەلەدى
Sports.kz-تىڭ Sky Sports-قا سىلتەمە جاساپ حابارلاۋىنشا، بۇرىن جاقيانوۆپەن بىرگە جاتتىققان بارنەتت جەڭىل سالماقتاعى قازاقستاندىق بوكسشىنىڭ WBA Super نۇسقاسى بويىنشا الەم چەمپيونى اتاعىن تارتىپ الا الاتىنىنا سەنىمدى.
«ءبىز جاقيانوۆپەن بىرگە ريككي حاتتوننىڭ جەتەكشىلىگىمەن ءبىر زالدا جۇمىس ىستەدىك. ول مىقتى بوكسشى جانە ديۆيزيوننىڭ كوپتەگەن جاۋىنگەرلەرى ودان الشاق جۇرەتىن. ءبىراق مەن بۇل ايقاستىڭ بولعانىن قالايمىن جانە جەڭىسكە جەتەمىن دەپ ويلايمىن»، - دەدى بارنەتت. ەسكە سالايىق، 11 -اقپان كۇنى جانات جاقيانوۆ امەريكالىق روشي ۋوررەندى (14-2, 4 ك و) جەڭىپ، WBA Super جانە IBO- نىڭ جەڭىل سالماقتاعى تيتۋلىنا يە بولدى.
قازاقستاندىق بوكسشى اتالمىش جەڭىسىنەن كەيىن Boxingscene.com رەيتينگىندە توعىزىنشى ورىننان ەكىنشىگە كوتەرىلدى. سونداي-اق جاقيانوۆتىڭ جەڭىپ العان WBA Super جانە IBO بەلبەۋلەرى، قازاقستاندى كاسىپقوي بوكستاعى تيتۋلدار سانى بويىنشا الەم ەلدەرىنىڭ بەستىگىنە ەنگىزدى.
ەندى قازاقستاندىقتاردىڭ قورجىنىندا ءتورت بەلبەۋ: ۇشەۋى (WBA Super، WBC جانە IBF) گەننادي گولوۆكيندە (36-0, 33 ك و) جانە بىرەۋى (WBA Super) جاقيانوۆتا بار. ودان بولەك، ەكى بوكسشى دا IBO تيتۋلىن يەمدەنگەن. الايدا، سالىستىرمالى تۇردە ونىڭ بەدەلى تومەن بولىپ ەسەپتەلىنەدى. قازاقستان چەمپيوندىق تيتۋلدار سانى بويىنشا بەسىنشى ورىندى فيليپپينمەن بولىسەدى. ءبىرىنشى ورىندى ا ق ش (12) السا، كەيىنگى ورىنداردا ۇلى بريتانيا (9)، جاپونيا (8) جانە مەكسيكا (7) تۇر.
اۆتور: گۇلميرا الياكپاروۆا
