مامىردا ەلوردانىڭ جاڭا تەمىر جول ۆوكزالى پايدالانۋعا بەرىلەدى - استانا اكىمى
دەپ حابارلايدى قازاقپارات.
«ۇستىمىزدەگى جىلدىڭ مامىر ايىندا اۋەجايدىڭ حالىقارالىق جانە ىشكى رەيستەرى بولىنگەن جاڭا تەرمينالىنىڭ قۇرىلىسى اياقتالىپ، وتكىزۋ مۇمكىنشىلىگى 7,6 ميلليون ادامعا دەيىن ارتادى. سونىمەن قاتار تىركەۋ ورىندارىنىڭ سانى ارتىپ، تۋريستەرگە تىركەۋدەن كەدەرگىسىز وتۋگە مۇمكىندىك بەرەدى»، - دەدى يسەكەشەۆ.
سونىمەن قاتار ەلوردا اكىمى وسى جىلدىڭ مامىر ايىندا جاڭا تەمىر جول ۆوكزالىنىڭ دا قۇرىلىسى اياقتالاتىندىعىن اتاپ ءوتتى. ۆوكزال پايدالانۋعا بەرىلگەننەن كەيىن ونىڭ جولاۋشىلاردى وتكىزۋ مۇمكىندىگى جىلىنا 9 ميلليون ادامعا دەيىن ارتاتىن بولادى.
«بۇل قازاقستاننىڭ بارلىق وڭىرلەرىنىڭ، سونىمەن قاتار تاياۋ شەت ەلدەردىڭ تۋريستەرىنە ەكسپوعا كەلۋگە مۇمكىندىك بەرەدى»، - دەدى ول.
يسەكەشەۆ كورمەگە كەلەتىن قوناقتاردى ورنالاستىرۋ ماسەلەسىنە قاتىستى دا جايتتارمەن ءبولىستى.
«قازىرگى ۋاقىتتا ەلوردادا 169 قوناق ءۇي مەن 36 حوستەل جۇمىس ىستەيدى. بۇعان قوسا، كورمە باستالار الدىندا تاعى 16 قوناق ءۇي كەشەنى اشىلادى. مۇنان بولەك، ءبىز جالدامالى باسپانالاردى تارتۋ جۇمىستارىن قارقىندى جۇرگىزۋدەمىز. جالعا بەرىلەتىن پاتەرلەر الەۋەتى شامامەن 10 مىڭدى قۇرايدى. جالپى، كەمىندە 35 مىڭ ورىن دايىنداۋ جوسپارلانۋدا»، - دەدى استانا اكىمى.
ايتا كەتەرلىگى، ەكسپو-2017 حالىقارالىق مامانداندىرىلعان كورمەسى 10 - ماۋسىمدا باستالىپ، 10 - قىركۇيەكتە اياقتالاتىن بولادى. كورمەگە 2 ميلليوننان استام ادام كەلەدى دەپ كۇتىلۋدە. ولار كورمەنى كەمىندە ەكى رەت ارالايدى دەپ جوسپارلانعان. جالپى كورمەنى تاماشالاۋشىلاردىڭ 85 پايىزىن قازاقستان ازاماتتارى، ال قالعان 15 پايىزىن شەتەلدىكتەر قۇرايدى. شەتەلدىكتەردىڭ باسىم بولىگىن ت م د ەلدەرىنىڭ جانە قىتايدىڭ ازاماتتارى قۇرايدى دەپ كۇتىلۋدە. قازىرگى ۋاقىتتا 112 مەملەكەت پەن 18 حالىقارالىق ۇيىم ەكسپو كورمەسىنە قاتىساتىندىعىن رەسمي تۇردە راستاپ وتىر.
اۆتور: مارلان جيەمباي
