استانا اتامبايەۆتىڭ سوزىنە قاتىستى ەندى نوتا جولدادى
س ءى م اقپاراتىنا قاراعاندا، توكتومۋشيەۆ 21 - اقپاندا مينيسترلىككە شاقىرىلىپ، وعان سىرتقى ىستەر ءمينيسترىنىڭ ورىنباسارى عالىمجان قويشىبايەۆ استانانىڭ «قىرعىزستان پرەزيدەنتىنىڭ 17- اقپاندا ايتقان سوزىنە بايلانىستى تاڭدانىسى مەن كەلىسپەۋشىلىگى» بىلدىرىلگەن نوتا تاپسىرعان.
نوتادا وسى كەزگە دەيىنگى ءتۇرلى دەڭگەيلەردەگى كەلىسسوزدەردە رەسمي بىشكەكتىڭ «بلوكادا مەن ادام شىعىنى» ماسەلەسىن كوتەرمەگەنى ايتىلعان.
قىرعىز پرەزيدەنتى المازبەك اتامبايەۆ 17 - اقپاندا Euronews تەلەارناسىنا سۇحبات بەرگەن. ول «ە ا ە و رەسەي مۇددەسىنە كوبىرەك جۇمىس ىستەيدى دەپ ەسەپتەمەيسىز بە؟» دەگەن سۇراققا «بۇل وداققا كىرمەسەك، وقشاۋ قالىپ قوياتىن ەدىك» دەگەن سارىندا جاۋاپ بەرگەن. ول: «2010 -جىلى قازاقستان بىزگە ءبىر جارىم اي بلوكادا جاساپ تاستاعان كەزدە بىزدە ادام شىعىنى دا بولدى» دەگەن.
ءبىرەر كۇن بۇرىن قازاقستان سىرتقى ىستەر مينيسترلىگى «المازبەك اتامبايەۆتىڭ ءسوزىن ەسكەردىك. ەندى قىرعىزستان تاراپىنان تۇسىنىكتەمە كۇتىپ وتىرمىز» دەپ مالىمدەگەن.
قىرعىزستان سىرتقى ىستەر ءمينيسترىنىڭ ءبىرىنشى ورىنباسارى دينارا كەمەلوۆا كەشە قازاقستاننىڭ وسى ەلدەگى ەلشىسى ايىمدوس بوزجىگىتوۆتى قابىلداپ، اتامبايەۆتىڭ سوزىنە تۇسىنىك بەرگەن. كەمەلوۆا 2010 -جىلعى ءساۋىر وقيعاسىنا بايلانىستى قازاقستان جاعى شەكاراسىن جاۋىپ، شەكتەۋ ەنگىزگەندە قىرعىزستان ازاماتتارىنا كادىمگىدەي قيىندىقتار تۋىنداپ، ول ادام ولىمىنە دەيىن اكەلىپ سوقتىرعانىن ايتقان، وعان مىسالدار دا كەلتىرگەن.
«ازاتتىق» جاڭالىقتارى
